Billboard
14 ოქტომბერი, 2024
13 ოქტომბერს Quemmekh-ის ახალი ალბომის მოსმენის საღამო Left Bank-ში გაიმართა.
ბენდმა 13 ოქტომბერს, Left Bank-ში, მსმენელის წინაშე მეხუთე ალბომი წარადგინა, რომლის სახელწოდებაა Quemmekh. ჯგუფის ვოკალისტ სანდრო ქერაულის თქმით, „ეს ქვემეხის ყველაზე ძლიერი და მნიშვნელოვანი ნამუშევარია“.
სანდრო ქერაული, QUEMMEKH-ის ფრონტმენი, ვოკალისტი:
„ქვემეხის – ქვემეხი (Self titled album). ამ ალბომის ღერძი ქვემეხია – გზა, რომელიც ქვემეხის კეთებისას გავიარე. პოლიტიკა და ცხოვრება თბილისში, რაღაცები, რაც ვისწავლე და რაღაცები, რაც ვერ ვისწავლე.
ალბომში ზოგიერთი ტრეკი აბსტრაქტულია, რთულია მარტივად აღმოაჩინო, რა იგულისხმება მათში, მაგრამ ყველაზე პირადული ტრეკები ყოველთვის ასეთი მაქვს, არაცნობიერის ნაკადია, განცდები და შეგრძნებები, რომლებიც პირდაპირ ფრაზაში ითარგმნება, შეიძლება სრულიად გაუგებარი კონტექსტით, მაგრამ ემოციური რიტმითა და შინაარსით, რომელიც შეიძლება მსმენელმა თავისი საკუთარი შინაარსით დატვირთოს, სუბიექტური და ამავე დროს ყველაზე ობიექტური უზოგადესი დეფინიციით და ეს სწორი წაკითხვა იქნება ნებისმიერ შემთხვევაში“.
Quemmekh ქართულ ანდეგრაუნდ მუსიკალურ სცენაზე მნიშვნელოვანი განაცხადია, რომელიც სათქმელს საზოგადოებაში ინდივიდუალიზმით და აქტუალური ტექსტებით გამოხატავს.
ბენდის სიმღერებში მნიშვნელოვანი ადგილი უკავია ტექსტებს, რომლებიც ღრმა შინაარსობრივ კონტექსტს და პროტესტს ასახავს.
„როგორც წესი, მესიჯი ან ძალიან გასაგებია და საერთოდ არ ტოვებს თავისუფალ სივრცეს ინტერპრეტაციისთვის, ან სუნთქავს თავისუფლად და, ვისაც როგორ უნდა, ისე იგებს. ორივე ტიპის ტრეკების წერა მიყვარს და ბლომად დაგროვდა ამასობაში, ყველა სხვადასხვა მიზანს ემსახურება”.
„ალბომის ქავერი და ფოტოები მარიამ ანდღულაძისა და საბა გორგოძის გადაღებულია, მაშო (მარიამ გელაშვილი) ესთეტიკურ კონცეფციაზე მუშაობდა, სარალა, საბა ქარსელაძე და ჯუღელა ფროდაქშენის დახვეწაში და ორგანიზებაში მეხმარებოდნენ, გიორგი მირიანაშვილმა მასტერინგი გააკეთა. მოკლედ, კოლექტივის ძირითადი ნაწილი იყო ჩართული მუშაობაში. ალბომში ახალი ჟღერადობაა, ახალი თემები და გაზრდილი, უფრო ჩამოყალიბებული პერსპექტივა იმაზე, თუ რა მომწონს. მუსიკაზე და ტრეკების პროდუსინგზე მარტომ ვიმუშავე (ზოგიერთ ბილიკში ნიკა მოსიაშვილის ადრე ჩაწერილი რიფებია გამოყენებული). ძალიან საინტერესო პროცესი იყო, მომეხმარა იმის დანახვაში, თუ რა მიმართულებით მინდა მომავალში წასვლა და რა არის ის, რასაც მე თვითონ მუსიკაში ყველაზე მეტად ვაფასებ. სულ 10 ბილიკი იქნება ალბომში, შეიძლება CD-ზე მეტი იყოს, ბონუს კონტენტის გაფანტვა ყოველთვის მიყვარს იქით-აქეთ.
იმედი მაქვს, რომ მსმენელი კარგად მიიღებს ამ ახალ ნამუშევარს და აჰყვება ქვემეხს ახალ მიმართულებაში, როგორც ჟღერადობით, ისე ესთეტიკით. ალბათ ეს ქვემეხის ყველაზე ძლიერი და მნიშვნელოვანი ნამუშევარია.“
ქართული ბენდი Quemmekh 2015 წელს ჩამოყალიბდა. ბენდის მუსიკას ძლიერი საპროტესტო სულისკვეთება დაჰყვება, რომელიც ქვეყანაში სოციალურ პოლიტიკურ საკითხებზე ამახვილებს ყურადღებას.
მოისმინეთ Quemmekh-ის ახალი ალბომი სახელწოდებით Quemmekh:
