ტიმოთი შალამე წარსულში უკვე იყო Saturday Night Live-ის წამყვანი, მაგრამ ვარსკვლავი მაყურებლის წინაშე მუსიკალური სტუმრის ამპლუაში აქამდე არ წარდგენილა. ოფიციალურად დაანონსდა, რომ მსახიობი 25 იანვარს NBC-ის კომედიურ შოუს მიწვეული წამყვანის და ამავდროულად მუსიკალური სტუმრის სტატუსითაც ეწვევა. ახლახან მაყურებელმა შალამე მუსიკის ერთ-ერთი უდიდესი ცოცხალი ლეგენდის, ბობ დილანის როლში იხილა. მსახიობმა დილანი განასახიერა ჯეიმს მანგოლდის ბიოგრაფიულ ფილმში A Complete Unknown. ამ ნამუშევარში ტიმოთი შალამემ ყველა ვოკალური ნომერი თავად შეასრულა.
შალამე პირველად SNL-ზე 2020 წელს გამოჩნდა. სამი წლის შემდეგ ის კვლავ მასპინძლობდა შოუს. შალამეს სამომავლო გამოჩენამდე ერთი კვირით ადრე SNL-ის მუსიკალური სტუმარი GloRilla იქნება. რეპერი პირველად შოუს 18 იანვრის ეპიზოდში ეწვევა. რეპერის სადებიუტო სოლო ალბომი Glorious სამი თვის წინ გამოვიდა და Billboard 200-ის ჩარტში მე-5 ადგილი დაიკავა. 18 იანვრის ეპიზოდს დეივ შაპელი წაიყვანს. კომიკოსისთვის ეს იქნება მეოთხე შემთხვევა, როცა ის შოუს მიწვეული წამყვანის სტატუსით გაუძღვება.
SNL ამჟამად თავის 50-ე სეზონს მაუწყებლობს, ხოლო 16 თებერვლისთვის სპეციალური საიუბილეო ეპიზოდი იგეგმება. ამ სეზონის ეპიზოდებს გაუძღვებიან არიანა გრანდე, ჩარლი XCX, ჯონ მალენი, კრის როკი, მარტინ შორტი და სხვა ვარსკვლავები. მუსიკალურ სტუმრებს შორის კი იქნებიან ჰოზიერი, გრეისი აბრამსი და სტივი ნიქსი.
