ეს მომღერლის მეოთხე ალბომია, რომელიც ჩარტის პირველ ადგილს იკავებს.
კარიერაში მეოთხედ, FKA Twigs „ბილბორდის” საცეკვაო ალბომების ჩარტის ლიდერია. ამჯერად პირველი ადგილი წილად Eusexua-ს ხვდა, რომელიც 24 იანვარს გამოვიდა. მუსიკოსი მანამდე ჩარტში სამჯერ ლიდერობდა: 2014 წელს ალბომით LP1, 2019 წელს ალბომით Magdalene და 2022 წელს ალბომით Caprisongs.
საცეკვაო ალბომების ჩარტში ლიდერობის მაჩვენებლით FKA Twigs გაუთანაბრდა ისეთ არტისტებს, როგორებიც არიან Aphex Twin, ლინდსი სტირლინგი, მია, მარშმელო და Pet Shop Boys და გახდა მეხუთე მუსიკოსი, რომელსაც ჩარტის არსებობის 24-წლიან ისტორიაში ყველაზე მეტი ლიდერი ალბომი აქვს, ლედი გაგას (7 ალბომი), ლუი დევიტოს (7 ალბომი), Daft Punk-ისა (6 ალბომი) და Chainsmokers-ის (6 ალბომი) შემდეგ.
FKA Twigs-მა საცეკვაო ალბომების ჩარტში Charli XCX-ის Brat-ის დომინაცია დაასრულა, რომელიც 33 კვირის განმავლობაში ინარჩუნებდა ლიდერობას. ამასთანავე, Eusexua 24-ე ადგილზე გავიდა Billboard 200-შიც, რაც აღნიშნულ ჩარტში მუსიკოსის ამ დრომდე ყველაზე მაღალი მაჩვენებელია.
