4D Monster Lobsters-მა ახალი სინგლი და მასზე შექმნილი ანიმაციური ვიდეოკლიპი გააზიარა. ტრეკი ალბომ Travel Guide-ში შევა, რომლის გამოსვლაც 2026 წლის მარტში იგეგმება. აღსანიშნავია, რომ ტრეკში ვიოლინოზე მარიამ მაკალათია უკრავს, საყვირზე კი გიორგი მიგრიაული.
ბექა თევდორაშვილი – 4D Monster Lobsters-ის სოლისტი:
„PRAGA არის ერთ-ერთი ტრეკი ალბომიდან Travel Guide, რომელიც 2026 წლის მარტში გამოვა. ამ ალბომისთვის კომპოზიციებს უკვე დიდი ხანია, ვაგროვებთ. KRETA, SITBO, OMW, „საქართველო” და კიდევ ბევრი გამოვა. ყველა მათგანზე სამუშაო პროცესები თითქმის დასრულებულია. გვინდა, ეტაპობრივად მივაწოდოთ მსმენელს ყველაფერი. PRAGA-ც ერთ-ერთი ქალაქის სახელია, როგორც ამ ალბომში შესულ სხვა ტრეკებს ჰქვიათ. ანიმაციის შექმნა დიდი ხნის განმავლობაში გვქონდა ჩაფიქრებული, მე მქონდა ინტერესი, რომ მესწავლა ანიმაციის გაკეთება და ცოტა დიდი ხანი დასჭირდა ამ ყველაფერს, იმიტომ, რომ აბსოლუტურად ყველაფერი პირველი იყო ჩემთვის, რაც გავაკეთე, მაგრამ საბოლოო ჯამში შედეგით ძალიან კმაყოფილი ვარ, მით უმეტეს, პირველია და ძალიან ბევრ შესაძლებლობას ხსნის სამომავლოდ. სხვათაშორის, ტრეკმა კარგად წაიღო, ამას არ ველოდით და ალბათ ანიმაციამაც ითამაშა რაღაც როლი. ტრეკს ძალიან კარგი გამოხმაურება აქვს, რაც გვახარებს.”
ტრეკის კონცეფცია, ისევე, როგორც ალბომში შესული სხვა კომპოზიციები, მუსიკალური ძიებაა, სადაც ყოველი ახალი სიმღერა სხვადასხვა ქალაქებში თავგადასავლების აღმოჩენაა. მომავალი ალბომი Travel Guide-იც ერთგვარად სხვადასხვა შთაბეჭდილებების რუკას ქმნის, რომელიც მსმენელს მუსიკალურ მოგზაურობასთან ერთად შინაგანი გზების პოვნაშიც ეხმარება.
მოუსმინეთ 4D Monster Lobsters-ის სიმღერას – PRAGA:
