მირიან ხუხუნაიშვილმა ბეთჰოვენფესტზე ქართული სიმღერა შეასრულა. „დაიგვიანეს”, ოპერიდან „პატარა კახი” განსაკუთრებით ცნობილია ჰამლეტ გონაშვილის შესრულებით. მუსიკის ავტორი ნიკო სულხანიშვილი, ტექსტის კი – აკაკი წერეთელია.
„ახლაც ძნელად ვიჯერებ, რომ მოვიკრიბე გამბედაობა და ეს გამორჩეული სიმღერა, რომელსაც გულით ვატარებდი ბევრი წელი და რომლის მღერაც მეგობრების გარემოცვაშიც კი ვერასდროს გავბედე, ბეთჰოვენის ფესტივალზე სავსე დარბაზის წინაშე, პირდაპირ ეთერში ვიმღერე,” – წერს ხუხუნაიშვილი და სიმღერის ვიდეოს აქვეყნებს.
მირიან ხუხუნაიშვილი თბილისის ახალგაზრდული ორკესტრის სამხატვრო ხელმძღვანელი და მთავარი დირიჟორია. გასულ თვეში ორკესტრი გერმანიას სტუმრობდა, სადაც ბეთჰოვენფესტის ფარგლებში ბონსა და ბერლინში ორი კონცერტი გამართა. ბეთჰოვენის გარდა, ორკესტრმა გერმანელ მსმენელს ქართველი კომპოზიტორების ნაწარმოებებიც წარუდგინა, მათ შორის იყო ცოტნე ზედგინიძის ნაწარმოების მსოფლიო პრემიერაც.
