მას შემდეგ, რაც ილონ მასკმა „ტვიტერი“ შეიძინა და აღმასრულებელი დირექტორის პოზიცია დაიკავა, სოციალური ქსელი არაერთმა ცნობილმა ადამიანმა დატოვა. „ტვიტერის“ და მასკის ირგვლივ მიმდინარე მოვლენებს, ახლახან დიონ უორვიკი გამოეხმაურა. უორვიკმა ილონ მასკთან საუბრის სურვილი გამოთქვა. მომღერალს სურს, სოციალურ ქსელთან დაკავშირებით, ბიზნესმენის რეალური ზრახვები გაარკვიოს.
„მას უნდა შევხვდე. ვიცი, რომ უამრავმა ადამიანმა დატოვა ტვიტერი. აუცილებელია ვიცოდეთ, თუ რას აპირებს მომავალში. ის ამ თამაშში ახალია. მისი ამოსავალი წერტილი სიტყვის თავისუფლებაა, ისევე, როგორც – ჩემი. თუმცა ამის მიღწევის კონკრეტული გზები არსებობს.“ – აღნიშნა უორვიკმა ჟურნალ People-თან საუბრისას.
მომღერალმა ილონ მასკს მიმართა – „რა არის შენი რეალური განზრახვა? სიტყვის თავისუფლებისადმი შენი დამოკიდებულება გასაგებია, მაგრამ როგორ აპირებ მოქმედებას?“
18 დეკემბერს ილონ მასკმა გამოკითხვა ჩაატარა. ბიზნესმენმა სოციალური ქსელის მომხმარებლებს ჰკითხა, უნდა დაეტოვებინა, თუ არა „ტვიტერის“ აღმასრულებელი დირექტორის პოზიცია. გამოკითხვაში მონაწილეთა 57,5%-მა, რაც 17,5 მილიონზე მეტი ადამიანია, თანამდებობიდან წასვლის გადაწყვეტილებას დაუჭირა მხარი.
გამოკითხვა ასევე ჩაატარა რეპერმა Snoop Dogg-მა. მან გამომწერებს მიმართა კითხვით, უნდა წამოაყენოს, თუ არა თავისი კანდიდატურა „ტვიტერის“ აღმასრულებელი დირექტორის პოზიციაზე. პოსტზე დადებითი პასუხი დაახლოებით სამმა მილიონმა ადამიანმა დააფიქსირა.
