მადონას 1992 წლის ცნობილი ეროტიკული ფოტოალბომის Sex-ის გამოცემიდან 30 წლის იუბილეს აღნიშვნას კრისტის აუქციონი განაგრძობს. Madonna x Meisel — The SEX Photographs ასე ერქმევა პროექტს, რომელიც ივ სენ ლორანის მიერ 2022 წელს მადონას ხელახლა გამოცემული წიგნის საჯარო ჩვენებებსა და აუქციონს გულისხმობს, სადაც 40-ზე მეტი ნამუშევარი გაიყიდება. აუქციონი 6 ოქტომბერს ნიუ-იორკში გაიმართება, თუმცა მანამდე ფოტოები ლონდონში, პარიზსა და ნიუ-იორკში გამოიფინება.
თავის დროზე წიგნმა დიდი სენსაცია გამოიწვია სტივენ მეისელის ეროტიკული ფოტოებისა და თან დართული ტექსტების დამსახურებით, რომლითაც მადონა თავის დომინანტ პერსონაჟს Mistress Dita-ს წარმოაჩენდა. ფოტოებში მადონასთან ერთად პოზირებდნენ რეპერები Big Daddy Kane და Vanilla Ice, ნაომი კემპბელი, გეი პორნოვარსკვლავი ჯოი სტეფანო და სხვები.
Sex ყველა დროის ყველაზე გაყიდვადი ყავის მაგიდის წიგნი გახდა. 2022 წელს კი მადონამ და ივ სენ ლორანის კრეატიულმა დირექტორმა მისი გამოშვებიდან 30 წლის იუბილე აღნიშნეს და ალბომი ახლიდან, შეზღუდული ტირაჟით გამოსცეს.
„ის ჰაიპი და მხურვალე ენერგია, რომელსაც მადონა ასხივებდა 1990-იანების დასაწყისში, სტივენ მეისელის ფოტოებმა უკვდავყო,” – წერია კრისტის აუქციონის მიერ გავრცელებულ განცხადებაში. „მან იცოდა, როგორ დაეჭირა პოპის დედოფლის ხიბლი და სექსუალურობა სრულიად უკონკურენტო გზით. ის, რაც წიგნის გამოცემიდან 30 წლის შემდეგ გახდა ცხადი, არის, რომ ეს ნამუშევრები დღემდე საკულტო ფოტოებად დარჩა.”
