ჯგუფ LOUDspeakers-ის სიმღერამ სახელწოდებით In This World ვიდეოების გაზიარების პლატფორმა Youtube-ზე მილიონ ნახვას გადააჭარბა. ტრეკი შესულია ჯგუფის სადებიუტო ალბომში სახელწოდებით Lighthouse, რომელიც 2015 წელს გამოიცა.
ლევან ლაუდაძე – LOUDspeakers -ის ვოკალისტი:
„როდესაც არტისტი საკუთარი შემოქმედების საჯაროდ გამოტანას იწყებს, ცხადია მისთვის მნიშვნელოვანია აუდიტორიის შეფასებები და შესაბამისად მოსმენების და გაზიარების რიცხვი დიდ როლს ასრულებს. ჩვენთვის ძალიან სასიხარულოა ის, რომ მთლიანად ალბომი Lighthouse ძალიან წარმატებული აღმოჩნდა. მის შექმნაში არაერთი ადამიანის დიდი შრომაა ჩადებული, განსაკუთრებით ჩვენს პროდიუსერს, გიორგი გვარჯალაძეს, რადგან Lighthouse სწორედ მის მიერ ჩაიწერა.“
აღსანიშნავია, რომ In This World ამ ალბომის მეორე სიმღერაა, რომელიც Youtube-ზე ნახვებით მილიონიან ნიშნულს გადასცდა – ამ დროისათვის 11 მილიონი ნახვა აქვს LOUDspeakers-ის ტრეკს, სახელწოდებით World In My Eyes.
LOUDspeakers 2009 წელს შეიქმნა. ჯგუფის ჟანრობრივი მიმართულება ალტერნატიული ინდი როკია. მსმენელის დიდი აუდიტორიის წინაშე ჯგუფის დებიუტი 2010 წელს Altervision/Newcomers-ზე შედგა. მას შემდეგ LOUDspeakers ქართული მუსიკალური სცენის ერთ-ერთი ყველაზე აქტუალური ბენდია.
LOUDspeakers-ის ჯგუფის შემადგენლობაში არიან: ვოკალი – ლევან ლაუდაძე, კლავიში – სანდრო წიკლაური, ბასი – ლევან მამალაძე და დრამი – გიორგი ბულბულაშვილი.
მოუსმინეთ ჯგუფ LOUDspeakers-ის სიმღერას, სახელწოდებით In This World:
