Rammstein-ის სოლისტი ტილ ლინდემანი ოფიციალური ბრალდებისგან თავისუფალია მას შემდეგ, რაც ბერლინის პროკურატურამ მის მიმართ აღძრული სექსუალური ძალადობის საქმის გამოძიება მტკიცებულებების ნაკლებობის გამო დაასრულა.
საქმე ივნისში დაიწყო. გერმანელი პროკურორები ტილ ლინდემანზე გამოძიებას აწარმოებენ მას შემდეგ, რაც ინდუსტრიულ მეტალ ბენდ Rammstein-ის სოლისტი არაერთმა ქალმა დაადანაშაულა სექსუალურ ძალადობაში.
ერთ-ერთი ქალი BBC-სთან საუბარში ამბობდა, რომ მაისში იგი მომღერალთან სექსუალური ურთიერთობისთვის აიყვანეს. იგი ამტკიცებდა, რომ მის სასმელში ნარკოტიკი გაურიეს, თუმცა აღნიშნავდა, რომ სექსუალური ძალადობის მსხვერპლი არ ყოფილა.
თავად ლინდემანი აღნიშნულ ბრალდებებს მუდმივად უარყოფდა. 60 წლის მუსიკოსის ადვოკატები საჩივრებს „გამონაკლისის გარეშე ტყუილს” უწოდებდნენ.
ამჟამად კი ლინდემანი ყველა ბრალდებისგან განთავისუფლდა. „გამოძიების შედეგად, მოწმეების მიერ გაკეთებული განცხადებები არ დადასტურდა,” – ნათქვამია პროკურატურის პრესრელიზში.
პროკურატურის გადაწყვეტილების შემდეგ ლინდემანმა სოციალურ მედიაში მოკლე პოსტი დაწერა: „მადლობელი ვარ ყველასი, ვინც მოუთმენლად ელოდა გამოძიების დასრულებას.”
როცა თვის დასაწყისში მუსიკოსის დადანაშაულების ტალღა დაიწყო, ბენდის წევრებმა განცხადება გაავრცელეს, სადაც გმობდნენ ყველანაირი ტიპის ძალადობას და ამბობდნენ, რომ ბენდის ფანები თავს უსაფრთხოდ უნდა გრძნობდნენ, როგორც სცენის წინ ასევე მის მიღმა. ამასთანავე, ბენდი ფანებს სთხოვდა, რომ წინასწარ ნუ განსჯიდნენ მათ.
