27 ოქტომბერს მუსიკოს დავით დათუნაშვილის ხალი ალბომი სახელწოდებით „ზოგ ყვავილს უფრო ნაზი მოპყრობა უნდა, თუ არ გაწვიმდა“ გამოიცემა. ალბომი 16 კომპოზიციას აერთიანებს, მათ შორის არის მუსიკალური კოლაბორაციები Vinda Folio-სთან, ანი ზაქარეიშვილთან, თამარ დათუნაშვილთან და ირაკლი აბრამიშვილთან. ალბომის გამოცემამდე მუსიკოსმა პირველი სინგლი, სახელწოდებით – „ქალთევზი“ წარადგინა.
დავით დათუნაშვილის შემოქმედება არაერთ მუსიკალურ პროექტთან არის დაკავშირებული. არტისტი ნამუშევრებს ქმნის ისეთი ჟანრობრივი მიმართულებებით, როგორებიც არის პოპი, ელექტრონიკა, ემბიენთი და ექსპერიმენტული მუსიკა. 2007 წელს ის ქართველი მსმენელისათვის კარგად ნაცნობი ინდი როკ ბენდის – Landmark-ის გიტარისტი იყო. 2009 წელს კი დავით დათუნაშვილმა გიგი ჯიქიასთან ერთად წარადგინა მუსიკალური პროექტი სახელწოდებით Okinawa Lifestyle. პროექტი ქართული მუსიკალური დაჯილდოების, Electronaut-ის გამარჯვებული გახდა. 2012 წლიდან არტისტმა თავის სოლო პროექტზე მუშაობა დაიწყო და ალბომი სახელწოდებით Composure გამოუშვა. მუსიკოსის ამ დროისათვის ბოლო ალბომი, სახელწოდებით 6 Plus, 2020 წელს გამოვიდა.
