„ეს სასიკვდილო ხაფანგი იყო”: ისრაელის ფესტივალის ტერაქტს გადარჩენილები გაქცევის ამბავს ჰყვებიან

„ისინი მხოლოდ ბავშვები იყვნენ, რომლებიც ფესტივალზე წავიდნენ.”
ფესტივალის ტერიტორი თავდასხმის შემდეგ
Baz Ratner for The Washington Post via Getty Images

პალესტინური დაჯგუფება „ჰამასი” ისრაელზე თავდასხმას განაგრძობს. ტერორისტული თავდასხმების ერთ-ერთი ცხელი წერტილი ღაზას საზღვართან ახლოს გამართული ელექტრონული მუსიკის ფესტივალი გახდა. 

ამ დრომდე, ისრაელის სამძებრო ორგანიზაცია „ზაკას” მონაცემებით, ფესტივალის ტერიტორიაზე 260 გვამია ნაპოვნი. არ არის ცნობილი ჰამასის მიერ გატაცებულ ადამიანთა რაოდენობა. New York Times-ის მიხედვით, სამშაბათს მინიმუმ 150 ადამიანი იქნა გატაცებული, ზოგიერთი მათგანი სწორედ ფესტივალიდან.

ტერორისტულ თავდასხმას აშშ-ის პრეზიდენტი ჯო ბაიდენიც გამოეხმაურა და წინა დღეების ძალადობრივ ქმედებებს შორის აღნიშნა „ახალგაზრდა ადამიანების ხოცვა, როცა ისინი მშვიდობის აღსანიშნავად მუსიკალურ ფესტივალს ესწრებოდნენ.” 

კვირის მონაცემებით, ტერაქტის შემდეგ ფესტივალის 600-700 მონაწილე იძებნებოდა. ფესტივალის ერთ-ერთი მენეჯერის თქმით, დაკარგულთა რაოდენობა ჯერ კიდევ არ არის დაზუსტებული, თუმცა ისრაელის წყაროები დაახლოებით 150 ადამიანს ასახელებენ. ჯამში ფესტივალს 3000 ადამიანი ესწრებოდა. 

ისინი, ვინც გაქცევა მოახერხა, ტერორისტული თავდასხმის დეტალებსა და მათი გაქცევის ამბავს ჰყვებიან. მათ შორის არის შელი ბარელი, რომელიც ფესტივალზე სამკაულებსა და ტანსაცმელს ყიდდა. შაბათს გამთენიას, როცა სარაკეტო თავდასხმა დაიწყო, ბარელი და მისი მეუღლე მიწაზე დაწვნენ. მალე ფესტივალის დაცვამ დამსწრეებს გამოუცხადა, რომ გაქცეულიყვნენ, მანქანებთან მისულიყვნენ და ტერიტორია დაეტოვებინათ. ბარელმა და მისმა მეუღლემ 10 წუთი მოანდომეს ნივთების ჩალაგებას, შემდეგ ჩადეს მანქანაში და წავიდნენ. მაშინ ფიქრობდნენ, რომ ევაკუაცია სარაკეტო თავდასხმის გამო გამოცხადდა, რაც ისრაელში ჩვეულებრივი მოვლენაა.

მალე ისინი საცობში მოხვდნენ. აზრადაც არ მოსვლიათ, რომ შეიარაღებული ტერორისტები მოვიდნენ, უბრალოდ საცობისგან თავის არიდების მიზნით გზიდან გადაუხვიეს და მინდვრით წასვლა გადაწყვიტეს. რეალურად მათი სიცოცხლე ამ გადაწყვეტილებამ გადაარჩინა. 

„შემდეგ მივხვდი, რომ ტერორისტებმა დახოცეს ადამიანები წინა მანქანებში. ასე რომ, მათ აღარ შეეძლოთ მოძრაობა და დანარჩენები მათ უკან გაიჭედნენ. მათ შექმნეს საცობი ყველასთვის, ვინც უკან იყო. ეს სასიკვდილო ხაფანგი იყო.”

როცა ბარელმა და მისმა მეუღლემ მინდორი გაიარეს და გზაზე დაბრუნდნენ, ორ გაჩერებულ მანქანას მიადგნენ. ორივეს კარები ღია იყო, მგზავრები კი – გარდაცვლილები. 

ბარელის მეუღლემ მაშინვე მანქანა მოატრიალა და რამდენიმე წუთის შემდეგ ტელეფონზე შეტყობინება მიიღო, რომ ტერიტორიაზე შეიარაღებული თავდამსხმელები იყვნენ. „გადავწყვიტეთ, რომ რაც შეიძლება სწრაფად წავსულიყავით, სრული სიჩქარით, მხოლოდ მოსახვევებში ვანელებდით სვლას. რაკეტები ჩვენ გარშემო ეცემოდა და ვიფიქრე, რომ ის მომენტი იყო, როცა უნდა გვეთქვა „მიყვარხარ” და ერთმანეთს დავმშვიდობებოდით.”

თუმცა, საბედნიეროდ, ისინი გადარჩნენ და საბოლოოდ მიაღწიეს სახლს ცენტრალურ ისრაელში. სწორედ იქ აღმოაჩინეს, რომ მათი მეგობრებიდან ზოგი დახოცილი, ზოგი გატაცებული, ბევრი კი დაკარგული იყო. 

ნითაი, 26 წლის დაცვის თანამშრომელი თელ-ავივიდან, რომელიც ფესტივალს ესწრებოდა ჰყვება: „როცა გავრბოდი, მეგობარმა დამიძახა და მთხოვა, რომ თავისი დის პოვნაში დავხმარებოდი. მინდოდა მისი დახმარება, მაგრამ უნდა გავქცეულიყავი და დავმალულიყავი. ნითაიმ 16 კილომეტრი ირბინა და შემდეგ 10 საათის განმავლობაში ზეთისხილის ხეებში იმალებოდა. რაღაც მომენტში მან შეიარაღებული კაცები დაინახა, რომლებიც არაბულად საუბრობდნენ და იფიქრა, რომ იპოვეს. ისინი იმდენად ახლოს იყვნენ, რომ ტოტებიდან მათ ფეხებს ხედავდა. „მამაჩემის სახელზე ვლოცულობდი, რომელიც რამდენიმე წლის წინ გარდაიცვალა და ვემუდარებოდი, რომ დამხმარებოდა,” – იხსენებს ნითაი. 

შემდეგ კაცებმა ყვირილი დაიწყეს, რაც დაახლოებით ნახევარი საათი გაგრძელდა. ამის მერე გაეცალნენ ტერიტორიას, სადაც ნითაი სხვებთან ერთად იმალებოდა. მათ შორის იყო ორი არგენტინელი ტურისტი. მათ კიდევ რამდენიმე საათი გაატარეს ადგილზე. შემდეგ კი ისრაელის მხარე მივიდა და უახლოეს პოლიციის განყოფილებაში გადაიყვანა. ნითაი ამბობს, რომ მისი მეგობრის დის პოვნა ვერ შეძლო. 

უკვე ათწლეულებია, რაც ისრაელის საცეკვაო მუსიკის სცენა, შეიძლება ითქვას, რომ ყვავის. ყველა უიკენდზე, განსაკუთრებით მარტიდან ოქტომბრამდე, მთელ ისრაელში დიდი წვეულებები იმართება. მათი აუდიტორია 50-დან 10000 ადამიანამდე მერყეობს. ახლა უკვე რთულია იმის თქმა, თუ რა ბედი ეწევა ისრაელის მუსიკალურ სცენას ამ თავდასხმის შემდეგ.

წლების განმავლობაში ფესტივალის ერთ-ერთი პრომოუტერი და მენეჯერი ამბობს: „რაც აქ მოხდა, ეს კატასტროფაა. ყველაზე მნიშვნელოვანი ჩვენთვის არის, რომ მსოფლიოს ვანახოთ, რომ ეს არის დანაშაული უდანაშაულო ადამიანების წინააღმდეგ. ისინი არ მიეკუთვნებიან არც ერთ პოლიტიკურ მხარეს. ისინი მხოლოდ ბავშვები იყვნენ, რომლებიც წვეულებაზე წავიდნენ.”

Share
Tweet
Share
Share
Share

წინა სტატია

შერი მის პირველ სადღესასწაულო ალბომზე საუბრობს: „საშობაო ალბომის გამოცემას არ ვაპირებდი”

შემდეგი სტატია

„Billboard საქართველო“ წარმოგიდგენთ: ნია გუგავას რჩეული 5 არტისტი

შეიძლება დაგაინტერესოთ

ვაშინგტონის „ამერიკულმა უნივერსიტეტმა” ტეილორ სვიფტთან დაკავშირებული ეკონომიკის კურსი – Swiftonomics წარადგინა

მომღერალთან დაკავშირებული თემატური კურსები უკვე არსებობს ისეთ სახელგანთქმულ უნივერსიტეტებში, როგორებიც არის ჰარვარდი, სტენფორდი და სხვები.
მეტი
Aine Merme

Aine Merme-ს მუსიკალური საღამო

„ახალი EP სულ ოთხი სიმღერისგან შედგება რომელიც მუსიკის ჩემეულ აღქმას ასახვას და ინსტრუმენტული მუსიკის შესაძლებლობებს სხვადასხვა ეპოქის ჟანრების მიჯნაზე იკვლევს.“
მეტი
Nanka Gvari - 202

ნანკა გვარის ახალი სიმღერა  – 202

„ყოველთვის მინდოდა ჩემს სიმღერაში გამომეყენებინა ქართული ინსტრუმენტი ან ქართულ ნარატივზე ყოფილიყო. ჩემი აზრით ეს ამ სიმღერით მოვახერხე.“
მეტი