ქართველი არტისტი ლიზი გოზალიშვილი გერმანული Voice-ის ე.წ. ბრმა მოსმენიდან მეორე ტურში გადავიდა. ახალგაზრდა მუსიკოსმა მაიკლ ჯექსონის სიმღერა – Earth Song თავისებური ინტერპრეტაციით შეასრულა, რამაც მენტორებზე დიდი შთაბეჭდილება მოახდინა. მუსიკალური ნომრის დასრულებისას, ჟიურიმ აქცენტი ლიზის ხმაზე, შესრულების მანერასა და ვოკალურ შესაძლებლობებზე გააკეთა.
„ამ სიმღერაზე ასეთი კონტროლის ფლობა ისე, რომ ის შენ საკუთარ ნამუშევრად აქციო, თითქმის შეუძლებელია. ყველამ იცის ეს სიმღერა, ყველას უმღერია და მოუსმენია, თუმცა არასდროს მინახავს, ის ვინმეს თავისად ექცია“- მიმართა ლიზის გერმანული Voice-ის მენტორმა, მომღერალმა ჯოვანი ზარელამ.
ამის შემდეგ ჯოვანი ზარელა, ყველასათვის მოულოდნელად, სცენაზე ავიდა და ლიზისთან ერთად Earth Song-ის დუეტი შეასრულა.
ლიზი გოზალიშვილი სცენიდან მსოფლიოში მომდინარე მოვლენებსაც გამოეხმაურა და საკუთარი პოზიცია გააჟღერა – „მსოფლიოში ახლა ისევ ომია. მე საქართველოდან ვარ და ჩემმა ქვეყანამაც არაერთხელ გადაიტანა ომი. ჩემთვის ძალიან მნიშვნელოვანი იყო, რომ სწორედ ამ სიმღერით მეთქვა ის, რასაც ვფიქრობ“ – აღნიშნა ლიზიმ.
ნახეთ ლიზი გოზალიშვილის გამოსვლა გერმანული Voice-ის სცენაზე:
