ბილი აილიშმა და მისმა ძმამ ფინეასმა ოქროს გლობუსი მოიგეს ნომინაციაში საუკეთესო საავტორო სიმღერა ფილმისთვის Barbie. სიმღერამ What Was I Made For? ისეთი მეტოქეები დაამარცხა, როგორებიც არიან ბრიუს სპრინგსტინი, დუა ლიპა და სხვები.
ჯილდოს მისაღებად და-ძმა სცენაზე ერთად ავიდა. „ამ მომენტში ამას ნამდვილად არ ველოდი. მადლობა ჩემს ძმას, ფინეასს. შენ ხარ მიზეზი იმისა, თუ ვინ ვარ მე დღეს,” – მიმართა ძმას მომღერალმა, რის შემდეგაც მადლობა ფილმის შემოქმედებით ჯგუფს გადაუხადა.
ბილი აილიშმა სიმღერის შექმნის პირად ნაწილზეც ისაუბრა: „ზუსტად ერთი წლის წინ იყო, როცა ფილმი გვაჩვენეს. მე ამ დროს ძალიან დეპრესიული პერიოდი მქონდა. ამ სიმღერის დაწერამ კი, ასე ვთქვათ, გადამარჩინა. ერთი წლის შემდეგ კი აქ ვდგავართ. ეს მართლაც სიურრეალისტურია. საოცრად იღბლიანი და მადლიერი ვარ.”
What Was I Made For?, რომელიც აგვისტოში Billboard Hot 100-ის მე-14 ადგილზე მოხვდა, ოქროს გლობუსზე წარდგენილი იყო ასევე Barbie-ს ორ კომპოზიციასთან ერთად: დუა ლიპას Dance the Night და მარკ რონსონის და ენდრიუ უაიატის I’m Just Ken, რომელსაც რაიან გოსლინგი ასრულებს. ნომინაციაში ასევე წარდგენილი იყვნენ ბრიუს სპრინგსტინი, ჯეკ ბლეკი და ლენი კრავიცი.
ნახეთ ბილი აილიშის მადლობის სიტყვა:
Billie Eilish and Finneas win the Golden Globe for "What Was I Made For" at the 2024 #GoldenGlobes pic.twitter.com/ToJm1CmQZJ
— The Hollywood Reporter (@THR) January 8, 2024
