5 იანვარს MONO HALL-ში ნინი ნუცუბიძის და გიორგი გიგაშვილის კონცერტი გაიმართა. ლაივზე მსმენელმა არაერთი მსოფლიო ჰიტის და ცნობილი ქართული კომპოზიციის ორიგინალური ინტერპრეტაცია მოისმინა. გიორგი გიგაშვილთან და ნინი ნუცუბიძესთან ერთად სცენაზე ასევე წარდგნენ NIKALA, მარიამ კუბანსკი (ბას გიტარა) და დათა მუნჯიშვილი (დრამი).
გიორგი გიგაშვილის და ნინი ნუცუბიძის ერთობლივი პროექტის კონცერტები ყოველთვის მრავალფეროვანი მუსიკალური პროგრამით გამოირჩევა, რაც აუდიტორიისათვის ყოველ ჯერზე განსხვავებულ მუსიკალურ გამოცდილებას განაპირობებს. აღსანიშნავია, რომ მათ მიერ შესრულებული, ხშირად კარგად ნაცნობი კომპოზიციების ქავერებიც კი გამორჩეული ინდივიდუალიზმის მატარებელია, რაც უკვე მოსმენილ მელოდიასა, თუ ტექსტს ახალ სიცოცხლეს სძენს.
გიორგი გიგაშვილი:
„კონცერტისთვის მზადებას ლაივის დაგეგმვისთანავე ვიწყებთ. ამ პროექტის ფარგლებში სცენაზე მსმენელის წინაშე გამოსვლა ჩემთვის, როგორც არტისტისათვის, უდიდესი სიამოვნებაა. ამ დროს აუდიტორიისაგან უდიდეს ემოციებს ვიღებ.”
ნინი ნუცუბიძე:
„ჩვენ მუსიკალური შემოქმედების მიღმაც დროს ერთად ვატარებთ, ვმეგობრობთ და ერთმანეთის ძალიან კარგად გვესმის. ვფიქრობ, ეს კავშირი კონცერტის მსვლელობისას თავისებურ გარემოს ქმნის, რისი მონაწილე აუდიტორიაც ხდება. მუსიკალურ პროგრამაზე იდეურად გიორგი მუშაობს. მას ყოველთვის შეუძლია, ჟანრობრივად განსხვავებული სიმღერების ინტერპრეტაციისას ოქროს შუალედი დაიცვას.”
ნინი ნუცუბიძე ბერლინში, კატალისტის კრეატიული ხელოვნების და ტექნოლოგიის უნივერსიტეტში სწავლობს. მისი შემოქმედება აერთიანებს ქართულ ტრადიციულ კულტურულ მოტივებს, ელექტრონულ ჟღერადობას და ექსპერიმენტულ მუსიკას. ამჟამად ნინი ნუცუბიძე მუშაობს ახალ EP-ზე, სახელწოდებით Paper Planes. როგორც არტისტი „Billboard საქართველოსთან” საუბრისას აღნიშნავს, ჩანაწერს მსმენელს მალე წარუდგენს.
გიორგი გიგაშვილი კლასიკური მუსიკის პიანისტია და ამავდროულად ნინისთან და Janngo-სთან ერთად პოპ-ელექტრონულ მუსიკას ქმნის. გიორგი გიგაშვილი კლასიკური მუსიკის არაერთი პრესტიჟული საერთაშორისო პრემიის მფლობელია. 2023 წელს იგი BBC-ის ახალი თაობის არტისტების ორწლიანი პროგრამის მონაწილე გახდა.
3 comments