ოზი ოსბორნი როკ-ენ-როლის დიდების დარბაზში ჯერ კიდევ 2006 წელს შეიყვანეს როგორც Black Sabbath-ის ერთ-ერთი წევრი და იმ შემთხვევაში თუ მუსიკოსი წელსაც მიიღებს ამ ჯილდოს, ორმაგი ტიტულით Beatles-ის ოთხივე წევრს, ასევე ჯეფ ბეკს, ჯიმი პეიჯს, სტივი ნიკსსა და როდ სტუარტს გაუთანაბრდება. აღსანიშავია, რომ როკ-ენ-როლის დიდების დარბაზის ჯილდო სამჯერ მხოლოდ ერთ მუსიკოსს – ერიკ კლეპტონს აქვს მიღებული. Ბრიტანელ გიტარისტს ეს პატივი წილად ხვდა როგორც სოლო-შემსრულებელს, ასევე როგორც ერთ-ერთ წევრს ჯგუფებისა Yardbirds და Cream.
„ჩემთვის დიდი პატივია როკ-ენ-როლის დიდების დარბაზისგან ამ ნომინაციის მიღება. იყო იმ მცირერიცხოვან მუსიკოსებს შორის, რომელთაც მეორედ ხვდათ წილად ეს პატივი, მითუმეტეს ახლა… ალბათ ამას ვერასდროს წარმოვიდგენდი. ჩემი მუსიკალური კარიერის 44 წლის თავზე როკ-ენ-როლის დიდების დარბაზში წარდგენილი ვარ როგორც სოლო არტისტი და ის ფაქტი, რომ შემიძლია გავაგრძელო მუსიკის წერა, თან ეს აღიარება მივიღო, არის ზუსტად ის, რითაც წარმოუდგენლად ვამაყობ.”- განაცხადა ოზი ოსბორნმა.
ლეგენდარულმა Ბრიტანელმა მუსიკოსმა სოლო კარიერა ალბომ Blizzard of Ozz-ით დაიწყო, რომელიც 1980 წელს გამოუშვა. ოსბორნს ჯამში ცამეტი სტუდიური ალბომი აქვს გამოცემული, ბოლო ნამუშევარი სახელწოდებით Patient Number კი 2022 წელს გამოვიდა. მუსიკოსის საკულტო ჰიტებია: Crazy Train, Flying High Again, Bark at the Moon, No More Tears და Mama, I’m Coming Home.
ბოლოდროინდელი ჯანმრთელობის პრობლემების გამო, გასულ წელს მუსიკოსმა კონცერტების გამართვა ვერ შეძლო.
ოსბორნის მეუღლემ და მისმა მენეჯერმა შერონ ოსბორნმა ცოტა ხნის წინ მის გამოსამშვიდობებელ კონცერტზე ისაუბრა. ნოემბერში, ერთ-ერთ სატელევიზიო გადაცემაში, შერონმა მისი, როგორც სოლო არტისტის, როკ-ენ-როლის დიდების დარბაზში შეყვანასაც გაუსვა ხაზი.
„მათ იციან, რომ ოზი იმსახურებს იქ ყოფნას, მათ იციან, რომ იგი უკვე 43 წელია, რაც სოლო არტისტია. ოზის, როგორც სოლო შემსრულებელს, თითქმის ასი მილიონი ალბომი აქვს გაყიდული.
როკ-ენ-როლის დიდების დარბაზის წლევანდელი ლაურეატების გამოსავლენი სახალხო კენჭისყრა უკვე დაიწყო და ხმის მიცემა ვებ-გვერდ rockhall.com-ის საშუალებით არის შესაძლებელი. ბიულეტენები კი ინდუსტრიის წარმომადგენლებს მეილზე ეგზავნებათ. საზეიმო ცერემონია შემოდგომაზე, ქალაქ კვლივლენდშია დაგეგმილი.
