Oasis-ის ყოფილმა მომღერალმა და სოლო შემსრულებელმა ლიემ გალაგერმა ჟურნალ MOJO-თვის მიცემულ ინტერვიუში თავის უფროს ძმაზე ისაუბრა და თქვა, რომ ნოელმა როკის ისტორიაში ერთ-ერთ ყველაზე მოსალოდნელ გაერთიანებაზე უარი განაცხადა.
მრავალწლიანი ჭორების და ძმებს შორის დაძაბულობის შემდეგ ლიემ გალაგერმა MOJO-ს განუცხადა, რომ 30 წლის იუბილეს აღსანიშნად ნოელ გალაგერს 1994 წელს გამოშვებული სადებიუტო ალბომის, Definitely Maybe-ის ტურნე შესთავაზეს, რაზეც მან უარი განაცხადა.
„მას დავუკავშირდი, უფრო სწორედ ჩემი ხალხი დაუკავშირდა ნოელის მენეჯმენტს, ჩვენ მას Oasis-ის ტურნე შევთავაზეთ. ეს იქნებოდა დიდი ტურნე, სადაც საკმაოდ დიდ თანხებზე იყო საუბარი. მან კი უარი განაცხადა. თუმცა მე მის გარეშეც სასიამოვნო დროს გავატარებ.“ – აღნიშნა ლიემ გალაგერმა.
Definitely Maybe 1990-იანი წლების Britpop მოძრაობის ერთ-ერთი გამორჩეული ალბომია, მასში ისეთი ცნობილი სიმღერებია შესრული როგორიცაა: Supersonic, Shakermaker, Rock’n’Roll Star, Cigarettes & Alcohol და Live Forever.
Definitely Maybe ბრიტანეთის ჩარტების ისტორიაში ყველაზე სწრაფად გაყიდვად ალბომად დასახელდა. ბიტლზისადმი პატივისცემისა და პანკური სულისკვეთების ნაზავი Oasis-ის საფირმო შტრიხი იყო.
ბენდის კიდევ უფრო წარმატებული პერიოდი 1993 წელს ლეგენდარულ Creation Records-თან ხელმოწერით დაიწყო, რომელიც 1995 წელს ჰიტ სიმღერებით Some Might Say, Roll With It, Wonderwall, Don’t Look Back in Anger და Champagne Supernova გაგრძელდა. ბენდმა კიდევ ხუთი სტუდიური ალბომი გამოსცა, სანამ 2009 წელს განხეთქილება იჩენდა თავს. გალაგერებმა პრესაში და სოციალურ მედიაში ერთმანეთზე შეურაცხმყოფელი კომენტარები გააკეთეს და ხშირად ბენდის წარუმატებლობაში ერთმანეთს ადანაშაულებდნენ.
ბენდი 2024 წელს როკ-ენ-როლის დიდების დარბაზში იყო ნომინირებული, თუმცა, როგორც ჩანს, წელს ბენდი წარმატებას ვერ მიაღწევს. ლიემ გალაგერი იმედს არ კარგავს: „ეს სამყაროზეა დამოკიდებული, ეს მაშინ მოხდება, როცა მოხდება, რადგან სადავეები ჩვენს ხელთ აღარ არის. რაც შემეხება მე, მიყვარს ნოსტალგია და ამ მიმართულებით ბევრს ვაკეთებ.“ – განუცხადა ლიემ გალაგერმა MOJO-ს.
ინტერვიუს ბოლოს მან განაცხადა, რომ Stone Roses-ის გიტარისტ, ჯონ სკუაიერთან ერთად მომავალ ერთობლივ ტურნეზე Oasis-ის ან Stone Roses-ის არცერთ სიმღერას არ იმღერებს. „სიმღერები მხოლოდ ჩვენი ალბომიდან იქნება და შესაძლოა რამდენიმე ქავერიც იყოს“ – ამბობს ლაიმ გალაგერი.
