ერეკლე დეისაძემ ახალი სიმღერა, Du-Besh, და მასზე გადაღებული კლიპი გამოუშვა. მუსიკალური ვიდეოს რეჟისორი ჯუმბერ გამარჯობაშვილია, ოპერატორული ნამუშევარი კი ტატო კოტეტიშვილს ეკუთვნის.
ერეკლე დეისაძე:
„კლიპის იდეა მე და რეჟისორს გაგვიჩნდა და სცენარიც ასე ჩამოყალიბდა. ვიდეო თებერვალში გადავიღეთ და მასზე მუშაობის პროცესში ჩვენი მეგობრები იყვნენ ჩართულები. გამოქვეყნების პერიოდი ისე დაემთხვა, რომ თითქოს ახლანდელ კონტექსტს ეხმიანება. არ მინდა, ვიდეოს შინაარსსა და კონცეფციაზე საუბრისას კონკრეტული ვიყო. ამას მაყურებელს და მსმენელს მივანდობ – ნებისმიერ ინტერპრეტაციას მივესალმები.”
მუსიკალური ნამუშევრის ბიტი Nick Green-ს ეკუთვნის, ფროდაქშენზე ჯერონიმომ იმუშავა, მიქსინგსა და მასტერინგზე კი თორნიკე გველესიანმა.
გარდა აღნიშნული სიმღერისა, ამ დროისათვის ერთ-ერთი ბოლო მუსიკალური ნამუშევარი, რომელიც ერეკლე დეისაძის სახელთან არის დაკავშირებული, ალბომი „თავშეკავებაა“. ეს Eko & Vinda Folio-ს მეორე სტუდიური ჩანაწერია, რომელიც სადებიუტო ალბომის გამოსვლიდან ოთხი წლის შემდეგ, 2023 წლის ნოემბერში გამოიცა.
