ახალი ალბომის გამოცემის შემდეგ ტეილორ სვიფტი Billboard-ის მუსიკალურ ჩარტებში ისტორიული მონაცემებით იკავებს პოზიციებს. The Tortured Poets Department-მა Billboard 200-ის ალბომების ჩარტში პირველი ადგილი დაიკავა და მუსიკალური რეიტინგების უამრავი რეკორდი მოხსნა.
ოფიციალური მთვლელის, Luminate-ის მონაცემებით, სადებიუტო კვირაში The Tortured Poets Department-ის კომერციული მოგება 2.61 მილიონი გაყიდული ალბომის ეკვივალენტია. ეს Billboard 200-ის ისტორიაში მეორე ყველაზე მაღალი მაჩვენებელია. ტეილორ სვიფტის ალბომი ამ მხრივ მხოლოდ ადელის 2015 წლის ალბომს, 25-ს ჩამორჩება.
Billboard-ის Hot 100-ის მუსიკალურ ჩარტში ტეილორ სვიფტის ახალი ალბომის ყველა ტრეკი მოხვდა. პირველი ადგილი Fortnight-მა დაიკავა, რომელიც სვიფტმა Post Malone-თან ერთად ჩაწერა. Hot 100-ის ჩარტმა სვიფტის 32 სიმღერა გააერთიანა. ეს სია ახალ ტრეკებთან ერთად მოიცავს მომღერლის 2019 წლის ჰიტს – Cruel Summer.
საერთო მონაცემებით, Hot 100-ის მუსიკალურ ჩარტში სხვადასხვა დროს მომღერლის 263 სიმღერა მოხვდა. ამ მონაცემებით ტეილორ სვიფტი ქალ არტისტებს შორის პირველ ადგილზეა, ზოგადად მუსიკოსებს შორის კი მეორეზე და მხოლოდ დრეიკს ჩამორჩება.
