28 მაისს თბილისის სახელმწიფო კონსერვატორიის კამერულ დარბაზში ალტისტ ელენე გოგოძის სოლო კონცერტი გაიმართება. მუსიკალური საღამო ე.წ. პატარა კონცერტის კონცეფციით ტარდება. კონცერტზე გაჟღერდება ბახის „ადაჯიო და ფუგა” პირველი სავიოლინო სონატიდან, ფრანც ქსავიერ მოცარტის ჩელოს სონატის პირველი ნაწილი და ბელა ბარტოკის ალტის კონცერტის პირველი ნაწილი.
„ბილბორდ საქართველო” მუსიკოსს კონცერტის კონცეფციისა და პროგრამის შესახებ ესაუბრა.
„მინდოდა, თბილისში ზაფხულამდე ბოლო კონცერტი გამემართა. საქართველოში მიმდინარე მოვლენების გამო გადავწყვიტე, რომ აუდიტორიის წინაშე პატარა კონცერტის კონცეფციის ფარგლებში შემესრულებინა რამდენიმე ნაწარმოები. ზოგადად, კლასიკური ალტის პროგრამა მსმენელისათვის ნაკლებად ცნობილია, ამიტომ, მიმაჩნია, რომ კონცერტი საინტერესო იქნება. საღამოზე ჩემთან ერთად ფორტეპიანოზე სოფია ჩოხელი დაუკრავს. კონცერტისთვის სივრცედ კამერული დარბაზი შევარჩიეთ. ეს დარბაზი არაჩვეულებრივი აკუსტიკით გამოირჩევა და მას ძველებური სალონური კონცერტების დარბაზის ესთეტიკა აქვს. რაც შეეხება პროგრამას, ბახის „ადაჯიო და ფუგა” ძირითადად ალტზე არ სრულდება, მაგრამ შევეჭიდეთ ამ გამოწვევას. ასევე იქნება ფრანც ქსავიერ მოცარტის ჩელოს სონატის პირველი ნაწილი. ზოგადად საკონცერტო პროგრამებში სულ ამადეუს მოცარტია ხოლმე, ფრანც ქსავიერი კი მისი შვილია, ამიტომ მისი ნაწარმოების მოსმენაც, ვფიქრობ, აუდიტორიისათვის საინტერესო იქნება. ასევე დავუკრავ ბელა ბარტოკის ალტის კონცერტის პირველ ნაწილს, რომელიც, ჩემი აზრით, ალტისთვის ერთ-ერთი საუკეთესო კონცერტია, რაც კი ოდესმე დაწერილა,” – ამბობს ელენე გოგოძე.
რაც შეეხება ელენე გოგოძის მუსიკალურ მოღვაწეობას, ის თავდაპირველად ვიოლინოზე უკრავდა, თუმცა შემდეგ ალტით დაინტერესდა. როგორც თავად ამბობს, ალტი ძალიან ახლოს არის ადამიანის ხმასთან და ტემბრთან, რის გამოც სიმებიან ინსტრუმენტებში მისთვის ის ყველაზე მიმზიდველი აღმოჩნდა. ელენე გოგოძე 16 წლიდან ნოდარ ჟვანიას მოსწავლეა. ის ამ დრომდე არაერთ საერთაშორისო სცენაზე წარმდგარა. საკონკურსო პროგრამებში მონაწილეობამ საშუალება მისცა, არაერთ სახელგანთქმულ ალტისტთან გაევლო მასტერკლასი და ამ მხრივ ღირებული გამოცდილება მიეღო. ელენე გარკვეული დროის განმავლობაში ასევე სწავლობდა ინგლისის ქალაქ ბირმინგემში. ის ასევე იყო ლიზა ბათიაშვილის ფონდის ერთ-ერთი წარმომადგენელი წინანდლის ფესტივალზე 2023 წელს.
როგორც ელენე გოგოძე სამომავლო გეგმებზე საუბრისას ამბობს, სწავლის გაგრძელებას ევროპაში გეგმავს, რისთვისაც რამდენიმე წამყვანი უნივერსიტეტი აქვს შერჩეული. ამასთან ერთად დაგეგმილი აქვს საერთაშორისო კონკურსებში მონაწილეობა და კონცერტები ევროპის სხვადასხვა ქვეყანაში.
რაც შეხება 28 მაისის კონცერტს, მუსიკალურ საღამოზე დასწრება თავისუფალია. კონცერტის შესახებ დეტალები იხილეთ ბმულზე.
