ფრანგი პოპ მუსიკოსი, მსახიობი და მოდელი ფრანსუაზ არდი 80 წლის ასაკში გარდაიცვალა. იგი დიდი ხნის განმავლობაში ებრძოდა სიმსივნეს. მას დიაგნოზი ჯერ კიდევ 2004 წელს დაუსვეს. 2015 წელს არტისტის მდგომარეობა განსაკუთრებით დამძიმდა, როცა კომაში ჩავარდა. ფრანგი ვარსკვლავის გარდაცვალების შესახებ ინფორმაცია მისმა შვილმა, მუსიკოსმა თომას დუტრონმა გაავრცელა.
ფრანსუაზ არდი თავისი თაობის ერთ-ერთი ყველაზე აღიარებული ფრანგი ვარსკვლავი იყო. იგი 1944 წელს პარიზში დაიბადა და ნაცისტების მიერ ოკუპირებულ ქალაქში გაიზარდა. არდი ბავშვობიდან მუსიკისადმი ინტერესით და ნიჭით გამოირჩეოდა. როცა 18 წლის იყო მუსიკალურ ლეიბლთან გააფორმა კონტრაქტი და მისი პირველივე სინგლი ჰიტად იქცა.
ფრანსუაზ არდი მელანქოლიური ბალადებით იყო ცნობილი და მის სიმღერებს მთელი მსოფლიოს მასშტაბით იცნობდნენ. ვარსკვლავი გამორჩეული იყო თავისი იმიჯით და სტილის შეგრძნებითაც, რაც განსაკუთრებით ხიბლავდა მის ახალგაზრდა აუდიტორიას. არდიმ დიდ წარმატებას მიაღწია მოდის ინდუსტრიაშიც იგი ისეთ დიზაინერების მუზად იქცა, როგორებიც ივ სენ ლორანი და პაკო რაბანი იყვნენ.
როგორც მომღერალს, მას დიდი გავლენა ჰქონდა ისეთ მუსიკოსებზე, როგორებიც არიან ბობ დილანი და მიკ ჯაგერი. არდის თაყვანისმცემლებს შორის იყო დევიდ ბოუიც. რაც შეეხება არტისტის სამსახიობო კარიერას, იგი თანამშრომლობდა ისეთ დიდ რეჟისორთან, როგორიც მაგალითისათვის გოდარია.
ფრანსუაზ არდი იმ არტისტებს შორისაა, რომლებიც გასული საუკუნის 60-იანი წლების ფრანგული სახელოვნებო სივრცის სახედ იქცნენ. 2023 წელს არდი ჟურნალმა Rolling Stone-მა ყველა დროის 200 საუკეთესო არტისტს შორის დაასახელა.
