26 ივლისს ბათუმში სტარტს აიღებს რიგით მე-17 შავი ზღვის ჯაზ ფესტივალი. ღონისძიების ფარგლებში ქართველი მსმენელის წინაშე, ტრადიციულად, არაერთი ცნობილი შემსრულებელი წარდგება.
26 ივლისს ფესტივალს გახსნის 11 გრემის მფლობელი არტისტი, კომპოზიტორი და არანჟირების სპეციალისტი ფილიპ ლასისტერი, რომელიც სხვადასხვა დროს მუშაობდა ისეთ მუსიკოსებთან, როგორებიც არიან პრინცი, არიანა გრანდე, ჯილ სკოტი და სხვები. ლასისტერი ბათუმს ბენდთან ერთად ეწვევა.
27 ივლისს მსმენელის წინაშე შვეიცარიელი ვირტუოზი დრამერი ჯოჯო მაიერი წარდგება. მუსიკოსი კონცერტს ელექტრონულ კვარტეტთან ერთად გამართავს, სახელწოდებით Nerve, რომელიც თავად მაიერმა 1997 წელს დააარსა.
28 ივლისს კი შავი ზღვის ჯაზ ფესტივალს გრანდიოზული კონცერტით The Jacksons დახურავს. ტიტო, ჯეკი და მარლონ ჯექსონები ქართველი მსმენელის წინაშე ისეთ ჰიტებს შეასრულებენ, როგორებიცაა Can you feel it, I want you back, ABC და სხვები. ჯექსონები ამჟამად მსოფლიო ტურნეში იმყოფებიან, რომელიც მათ ოჯახზე გადაღებულ ფილმს ეძღვნება. ფილმის პრემიერა 2025 წელს შედგება.
ფესტივალს ბათუმის კორტები უმასპინძლებს. Ბილეთების შეძენას შეძლებთ ბმულზე.
