გიორგი ერგემლიძე მსოფლიოს ერთ-ერთი წამყვანი ციფრული პროგრამის, FL Studio-ს ბაზაშია. ინფორმაცია ამის შესახებ მუსიკოსმა სოციალური ქსელით გაავრცელა.
FL Studio ციფრული აუდიო სამუშაო სივრცეა, რომელიც 1998 წლიდან ფუნქციონირებს. ის ფართოდ გამოიყენება მუსიკის შესაქმნელად არტისტებისა და პროდიუსერების მიერ მთელი მსოფლიოს მასშტაბით. პროგრამას აქტიურად იყენებენ Metro Boomin, ალან უოკერი, Soulja Boy, მარტინ გარიქსი და სხვები. დღეიდან კი FL Studio-ს მომხმარებლებს თავიანთ მუსიკაში ქართველი არტისტის სემპლების გამოყენებაც შეეძლებათ. გიორგი ერგემლიძე პროგრამის ახალი პაკეტის, Retrowave Featured Artists-ის ბაზაში დაამატეს.
გიორგი ერგემლიძე:
„FL Studio-დან თავად მომწერეს და მთხოვეს, რომ ჩემი სიმღერებიდან კონკრეტული ინსტრუმენტები გამოეყენებინათ, რომლებიც ახლიდან გააკეთეს ისე, რომ სხვებსაც შეეძლოთ დაკვრა და მათი გამოყენება. გარდა ამისა, ჩამაწერინეს ჩემი ვოკალის ფრაზებიც (სემპლები). ეს ყველაფერი კი მათ ახალ FLEX პაკეტში შევიდა, სახელწოდებით Retrowave Featured Artists. აღსანიშნავია, რომ სულ მსოფლიოდან 7 არტისტი აირჩა ამ ბაზისთვის და მათ შორის ერთ-ერთი მე ვარ.”
