ექვსი წლის შემდეგ შადე პირველ ახალ სიმღერას გამოსცემს. კომპოზიცია სახელწოდებით Young Lion შევა ალბომში Transa, რომელსაც ორგანიზაცია Red Hot ტრანსგენდერთა შესახებ ცნობიერების ამაღლების მიზნით გამოსცემს. ალბომში მონაწილეობას იღებს 100-ზე მეტი მუსიკოსი, მათ შორის არიან შადე, სემ სმითი, ართურ ბეიკერი, ლორა ჯეინ გრეისი, ჯულიენ ბეიკერი და სხვები. Transa 22 ნოემბერს გამოვა.
შადეს ბოლო სინგლები 2018 წელს გამოვიდა: Flower of the Universe და The Big Unknown. ექვსწლიანი პაუზის შემდეგ კი ახალი სიმღერა მომღერალმა თავის ვაჟს, ისააკს მიუძღვნა, რომელიც თავს ტრანსგენდერ მამაკაცად მიიჩნევს.
The New York Times-ის აღწერით, კომპოზიციის ტექსტი „ემპათიითა და სინანულით არის გაჟღენთილი.” ტრანსგენდერი მუსიკოსი და აქტივისტი მასიმა ბელი კი Times-თან ინტერვიუში ამბობს: „საოცარია, ისეთი ლეგენდარული მუსიკოსისგან, როგორიც შადეა, მოსმენა თავისი ემოციური გამოცდილებისა, როგორც ტრანსგენდერი შვილის მშობელი.”
ალბომი, რომელშიც შევა ახალი კომპოზიციები, ქავერები და ექსკლუზიური სიმღერები, მიზნად ისახავს, მხარი დაუჭიროს ტრანსგენდერთა შესახებ ცნობიერების ამაღლებას. სამსაათნახევრიანი ალბომი რვა ნაწილადაა დაყოფილი, როგორც სიმბოლო პრაიდის დროშაზე გამოსახული ცისარტყელას რვა ზოლისა.
პროექტი აღწერილია, როგორც „სულიერი მოგზაურობა 8 თავსა და 46 სიმღერაში, რომელიც წარმოაჩენს ძალიან გამბედავ და დიდი წარმოსახვის მქონე ტრანსგენდერ და არაბინარულ არტისტებს, რომლებიც მუშაობენ ისეთ მოკავშირეებთან ერთად, როგორებიც არიან შადე, სემ სმითი და ბევრი სხვა.”
„ტრანსგენდერი ადამიანები ყოველთვის არსებობდნენ სხვადასხვა სახელით, სხვადასხვა დროსა და კულტურაში – ხშირად, როგორც სულიერი მკურნალები და ლიდერები. ის მოგზაურობა კი, რაც მათ გამოიარეს, შესაძლებლობების მაგალითს წარმოადგენს,” – ვკითხულობთ Transa-ს აღწერაში.
უკვე გამოვიდა ალბომის პირველი სინგლი – „პრინცის” I Would Die 4 U-ს ქავერი, რომელსაც ლორენ ოდელი და Prince & the Revolution-ის ყოფილი წევრები ვენდი და ლიზა ასრულებენ.
