მარტინ სკორსეზე იმ პროდიუსერთა შორისაა, რომლებმაც Beatles-ის ლეგენდარული პირველი ამერიკული მოგზაურობის შესახებ დოკუმენტური ფილმი შექმნეს. ფილმი, სახელწოდებით Beatles ‘64, ექსკლუზიურად Disney+-ზე 29 ნოემბერს გამოვა. გამოცემა Variety-ს ინფორმაციით, მასში შესულია ბიტლომანიის პიკში მყოფი ბენდისა და მათი გავეშებული ფანების აქამდე გამოუქვეყნებელი ვიდეომასალა.
სკორსეზეს პროდიუსერობით გამოცემული ფილმის რეჟისორი დევიდ ტედესკია. საარქივო მასალის გარდა, ფილმი მოიცავს ინტერვიუსებს ბენდის ცოცხალ წევრებთან: პოლ მაკარტნისა და რინგო სტართან. სიუჟეტი 1964 წლის თებერვალში ბენდის აშშ-ში მოგზაურობას მიჰყვება და მაყურებელს „კულისების ინტიმური ამბების” ჩვენებას ჰპირდება, მათ შორისაა ედ სალივანის შოუში ჯგუფის საკულტო სადებიუტო გამოსვლის კადრს მიღმა გადაღებული ვიდეომასალა და ასევე კადრები ოთხეულის პირველი ამერიკული შოუდან ვაშინგტონის კოლიზეუმში.
Beatles სალივანის შოუში პირველად 1964 წლის 9 თებერვალს გამოჩნდა. ეს იყო ეთერი, რომელიც რეკორდულმა 73 მილიონმა ადამიანმა ნახა. ბევრი მუსიკოსი კი სწორედ ამ გამოსვლას ასახელებს, როგორც მათი როკბენდის შექმნის შთაგონების წყაროს. Variety-ს ინფორმაციით, ფილმი ასევე მოიცავს იშვიათ კადრებს, რომლებიც დოკუმენტალისტებმა ალბერტ და დევიდ მეისლებმა გადაიღეს.
ფილმის სინოფსისში ვკითხულობთ: „1964 წლის 7 თებერვალს უპრეცედენტო ისტერიის ფონზე Beatles ნიუ-იორკში ჩავიდა. იმ წამიდან, როცა ისინი კენედის აეროპორტში დაეშვნენ, სადაც მათ ათასობით ფანი დახვდა, ბიტლომანიამ ნიუ-იორკი და მთელი ქვეყანა წალეკა. მათმა საოცარმა დებიუტმა ედ სულივანის შოუში ეკრანებთან 73 მილიონზე მეტი მაყურებელი დაატყვევა და შოუ იმ დროის ყველაზე ყურებად სატელევიზიო პროექტად აქცია. ფილმი Beatles ’64 გვიყვება უფრო ინტიმურ ამბებს კულისებიდან და ასახავს ჯონის, პოლის, ჯორჯისა და რინგოს მეგობრობას იმ პერიოდში, როცა ისინი წარმოუდგენელი პოპულარობის ზენიტში იყვნენ.”
სკორსეზეს გარდა, რომელმაც 2011 წელს ასევე გადაიღო დოკუმენტური ფილმი George Harrison: Living in the Material World, ფილმზე მუშაობდნენ სხვა პროდიუსერებიც, მათ შორის თავად მაკარტნი, რინგო სტარი, ჰარისონის მეუღლე ოლივია ჰარისონი, ლენონის შვილი – მუსიკოსი შონ ონო ლენონი და სხვები.
Beatles ’64-ის გამოსვლას მალევე, 22 ნოემბერს, მოჰყვება ჯგუფის შვიდი ამერიკული ალბომის ვინილის კოლექციის გამოცემაც, სახელწოდებით The Beatles: 1964 U.S. Albums in Mono. ალბომები ხელმისაწვდომი იქნება როგორც ცალ-ცალკე, ასევე ნაკრების სახით.
