33 წლის მსახიობი და მომღერალი ქუინსი ბრაუნი, რომელიც Diddy-ს ნაშვილები ვაჟია, საოჯახო ვლოგის თიზერს ავრცელებს, რომელშიც მაყურებელი შონ კომბსსაც ხედავს. ვლოგი საოჯახო არდადეგების დროს არის გადაღებული. ფრაგმენტში, რომელიც The Shade Room-ის ინსტაგრამზე გამოქვეყნდა, Diddy სამზარეულოში თავის შვილებთან ერთად მაისურის გარეშე დგას. ამჟამად დაპატიმრებული რეპერი კამერაში იყურება და იღიმის. ვიდეოს დასაწყისში ქუინსი ბაუნი მაყურებელს მიმართავს – „ჩემი ცხოვრება ისეთივეა, როგორიც თქვენი – თითქმის.”
ვიდეოს სხვადასხვა ფრაგმენტში ჩნდებიან Diddy-ს სხვა შვილებიც – 30 წლის ჯასტინი, 26 წლის კრისტიანი, 18 წლის ჩენსი და 17 წლის ტყუპები – დი’ლაილა და ჯესი. ცხადია, რომ ვიდეო რამდენიმე თვის წინ არის გადაღებული, რადგან Diddy 16 სექტემბრიდან პატიმრობაში იმყოფება. მას ბრალად ტრეფიკინგი და რეკეტი ედება.
შონ კომბსის სასამართლო პროცესი 2025 წლის მაისში დაიწყება. რეპერის წინააღმდეგ ამჟამად ბევრი მძიმე ბრალდებაა წაყენებული. ერთ-ერთ უახლეს სარჩელში მითითებულია, რომ 2000 წელს მან 13 წლის გოგო ნარკოტიკული საშუალებებით გათიშა და შემდეგ გააუპატიურა. იმავე ქმედებებში სდებს ბრალს Diddy-ს მისი ყოფილი პირადი მწვრთნელი.
Diddy-ს ადვოკატების გუნდი ამ დრომდე ყველა ბრალდებას უარყოფს და აღნიშნავენ, რომ სასამართლოზე სიმართლე გამჟღავნდება. Diddy-ს უფლებადამცველები ამტკიცებენ, რომ მათი დაცვის ქვეშ მყოფ ბრალდებულს არასდროს უძალადია ვინმეზე.
შონ კომბსს მხარდაჭერას უცხადებს მისი ოჯახიც, რომლის 22 ოქტომბერს გამოქვეყნებულ განცხადებაში ნათქვამია: „ჩვენ ვდგავართ ჭეშმარიტების მხარეს. ვიცით, რომ ის გაიმარჯვებს და ვერაფერი დაემუქრება ჩვენი ოჯახის სიძლიერეს. გვენატრები და გვიყვარხარ, მამა,” – აღნიშნა ოჯახმა განცხადებაში, რომელსაც ქუინსი ბრაუნიც შეუერთდა.
ბრაუნის ბიოლოგიური მშობლები მოდელი კიმ პორტერი და Al B. Sure! არიან. მას შემდეგ, რაც Diddy-მ 90-იან წლებში პორტერთან შეხვედრა დაიწყო, ქუინსი ბრაუნი იურიდიულად იშვილა. ამის შემდეგ კიმ პორტერს და შონ კომბსს კიდევ სამი შვილი შეეძინათ. 2007 წელს წყვილი ერთმანეთს დაშორდა.
2018 წელს პორტერი 47 წლის ასაკში პნევმონიით გარდაიცვალა. აღსანიშნავია, რომ ამ შძემთხვევამ საზოგადოებაში ეჭვები აღძრა და გარკვეული ხმების გავრცელება გამოიწვია, თუმცა შონ კომბსის შვილებმა ამ ყველაფერს შეურაცხმყოფელი ჭორები უწოდეს.
