„რედიოჰედის” ვოკალისტმა ტომ იორკმა მელბურნში გამართული სოლო კონცერტი შეწყვიტა და სცენა დატოვა მას შემდეგ, რაც ერთ-ერთმა მაყურებელმა ისრაელი-ჰამასის ომის შესახებ დარბაზში ყვირილი დაიწყო. გულშემატკივრის მიერ გადაღებულ ვიდეოში ჩანს, რომ მას შემდეგ, რაც მამაკაცმა იყვირა „ისრაელის გენოციდი ღაზაში”, ტომ იორკმა შოუ შეაჩერა და რეპლიკის ავტორს მიმართა, სცენაზე ამოსულიყო და ეს ყველაფერი პირადად ეთქვა.
„ამოდი და აქ ილაპარაკე,” – მიმართა მუსიკოსმა სცენიდან მამაკაცს, რომელსაც აუდიტორიის ნაწილი უკვე უსტვენდა. „ამოდი სცენაზე და თქვი, რისი თქმაც გინდა. მანდ ნუ დგახარ მხდალივით, აქ მოდი და თქვი. გინდა, ყველას საღამო ჩაუშხამო, ხომ?”
როგორც ჩანს, მამაკაცმა იორკს ისევ ომის თემაზე უპასუხა, რის შემდეგაც მუსიკოსმა განაცხადა: „კარგი, განაგრძე, მაშინ, მომავალ შეხვედრამდე” და სცენიდან გავიდა. „გარდიანის” ინფორმაციით, იორკი სცენაზე რამდენიმე წუთში დაბრუნდა ბოლო სიმღერის, Karma Police-ის შესასრულებლად.
“Don’t stand there like a coward,come here and say it!”
— Hen Mazzig (@HenMazzig) October 30, 2024
Radiohead’s Thom Yorke responded to an anti-Israel hackler who kept yelling about Gaza throughout his show in Melbourne today.
Yorke left the stage and came back after the crowd kicked out the protester. pic.twitter.com/a5yhtBWpTo
ტომ იორკი ამჟამად მსოფლიო ტურნეში იმყოფება, რომლის ფარგლებშიც ის ასრულებს როგორც სოლო რეპერტუარს, ასევე სიმღერებს „რედიოჰედისა” და The Smile-ის შემოქმედებიდან.
2017 წელს იორკმა მხარი დაუჭირა „რედიოჰედის” გადაწყვეტილებას თელ-ავივში კონცერტის ჩატარების შესახებ. მაშინ კრიტიკოსები, ისრაელის მთავრობის მიერ პალესტინელების მიმართ განხორციელებული ქმედებების გამო, ჯგუფს ბოიკოტისკენ მოუწოდებდნენ. მუსიკოსმა ასევე გააკრიტიკა ბოიკოტისა და სანქციების მოძრაობა და აღნიშნა, რომ ეს ხელს უშლის აუცილებელ დიალოგსა და კულტურულ ურთიერთობებს, რამაც შესაძლოა მოვლენებზე პოზიტიური გავლენა იქონიოს.
ივნისში „რედიოჰედის” გიტარისტმა ჯონი გრინვუდმა ვრცელი პოსტი გამოაქვეყნა ისრაელელ მუსიკოსთან, დუდუ ტასასთან თანამშრომლობის კრიტიკის საპასუხოდ. წყვილმა ისრაელში დაუკრა მაისში, ომის დროს, რომელშიც ჰამასის თავდასხმის შედეგად 1200 ისრაელელი ქალი, ბავშვი და სამოქალაქო პირი დაიღუპა.
პალესტინური მხარის თანახმად, ისრაელის სამხედრო ძალებმა ომში 42 000 პალესტინელი მოკლეს და ღაზის ინფრასტრუქტურის უმეტესი ნაწილი გაანადგურეს.
