26 ნოემბერს თბილისის ოპერისა და ბალეტის თეატრში დები იშხნელების შემოქმედებისა და ხსოვნისადმი მიძღვნილი საღამო გაიმართა. მუსიკალური პროგრამა მსმენელის წინაშე მანანა მენაბდემ და გორის ქალთა გუნდმა წარადგინეს. მუსიკალური საღამოს იდეა მანანა მენაბდესა და თეონა ცირამუას თანამშრომლობის შემდეგ დაიბადა. გაჩნდა იდეა, რომ ჩატარებულიყო კონცერტი, რომელიც დები იშხნელების შემოქმედების 100 წლის იუბილესაც სიმბოლურად გამოეხმაურებოდა.
საღამო მუსიკალურ ნომრებსა და დები იშხნელების შესახებ საუბრის ნაწილს აერთიანებდა. ღონისძიების წამყვანი ნიკოლოზ წულუკიძე აუდიტორიას უზიარებდა იმ ისტორიებს, რომლებიც იშხნელების შემოქმედებასთან და პერსონებთან იყო კავშირში.
მანანა მენაბდე:
„როდესაც ვსაუბრობ დები იშხნელების შემოქმედებაზე, მე გესაუბრებით არა როგორც მათი შთამომავალი, არამედ როგორც ხელოვანი. მათი სტილი გამორჩეული და უნიკალური იყო. რაც შეეხება კონცერტს და პროგრამას, მიხარია, რომ ამ საქმეს ხელი თეონა ცირამუას მსგავსმა პროფესიონალმა მოჰკიდა. მიხარია, რომ მისი სახით კარგი მეგობარი და კოლეგა შევიძინე.”
კონცერტზე, მანანა მენაბდეს, თეონა ცირამუასა და გორის ქალთა გუნდის შემადგენლობის გარდა, ვიხილეთ სპეციალურად მოწვეული სტუმრები: დათო თავაძე და ეთერ თათარაიძე.
თეონა ცირამუა:
„დები იშხნელების შემოქმედება, მათი რეპერტუარი მართლაც საოცარია. შეიძლება ითქვას, რომ ის სრულიად ცალკე ჟანრია. ამ კონცერტზე მუშაობა არ იყო მარტივი, რთულ საქმეს შევეჭიდეთ, მაგრამ, ვფიქრობ, თავი გავართვით.
იხილეთ ვიდეო:
