Southwest T (ტერი ფლენორი) ოფიციალურად თავისუფალია. ფლენორი ჰიპ-ჰოპის სამყაროში ცნობილია, როგორც ორგანიზებული დანაშაულებრივი გაერთიანების, Black Mafia Family-ს (BMF) ერთ-ერთი შემქმნელი. მან კრიმინალური ქსელი თავის ძმასთან, დემეტრიუს „Big Meech“ ფლენორისთან ერთად, 1985 წელს დეტროიტში ჩამოაყალიბა.
2008 წელს ძმებს 30 წლით მიუსაჯეს პატიმრობა. 2020 წელს, პანდემიის დროს, ტერის მსჯავრი შინაპატიმრობით შეეცვალა. მისი ძმა დემეტრიუსი კი სპეციალურ დაწესებულებაში გადაიყვანეს, სადაც სასჯელის მოხდას სრულ გათავისუფლებამდე – 2026 წლის 27 იანვრამდე გააგრძელებს.
Southwest T-მ Instagram-ზე გააზიარა სურათებისა და ვიდეოების სერია, სადაც მისი შეწყალების ოფიციალური დოკუმენტი და ელექტრონული სამაჯურის მოხსნა არის აღბეჭდილი. „Southwest T ოფიციალურად თავისუფალია,” – წერია პოსტის აღწერაში.
რამდენიმე წლის წინ ძმებმა 50 Cent-თან შეთანხმება დადეს, რომ მათ ცხოვრებაზე სერიალი გადაღებულიყო. სერიალი სახელწოდებით BMF STARZ-ის არხზე გადის. შოუში მთავარ როლებს ასრულებენ დემეტრიუს ფლენორი უმცროსი, რომელიც მამამისის, Big Meech-ის როლს ასრულებს და ასევე Da’Vinchi, რომელიც Southwest T-ს განასახიერებს. სერიალის მესამე სეზონი ახლახან დასრულდა, მეოთხე სეზონი კი 2025 წელს გამოვა.
Big Meech-მა BMF გავლენიან ბრენდად აქცია რეპის ინდუსტრიაში, როდესაც 2000-იანების დასაწყისში ატლანტაში გადავიდა და მუსიკალური ლეიბლი დააარსა, რომელიც არაერთ ცნობილ არტისტთან თანამშრომლობდა. მათ შორის ისეთ რეპერებთან, როგორიც არიან Young Jeezy და T.I.
