ბილი აილიშის ჰიტი Birds of a Feather კიდევ უფრო დიდ სიმაღლეებს იპყრობს. ახალი წლის დადგომამდე, ტრეკი 2024 წლის განმავლობაში Spotify-ზე ყველაზე ხშირად მოსმენილ სიმღერად დასახელდა.
როგორც 2 იანვარს ამერიკულმა მუსიკალურმა ლეიბლმა, სახელწოდებით Interscope, ოფიციალურად განაცხადა, 2024 წლის მიწურულს Birds of a Feather სტრიმინგ სერვის Spotify-ის წლის ყველაზე ხშირად მოსმენილი სიმღერების სტატისტიკაში პირველ ადგილზე დაწინაურდა. ინფორმაციის გამოცხადების დროს, ტრეკს 1.781 მილიარდი მოსმენა ჰქონდა.
გარკვეული დროით ადრე, Birds of a Feather Spotify-ის 2024 წლის ე.წ. Wrapped-ის მონაცემებით მესამე ადგილს იკავებდა. მას საბრინა კარპენტერის Espresso და ბენსონ ბუნის Beautiful Things უსწრებდნენ.
რაც შეეხება სიმღერას Birds of a Feather, ის შესულია ბილი აილიშის ამ დროისათვის ბოლო ალბომში, სახელწოდებით Hit Me Hard and Soft. ჰიტი Billboard Hot 100-ის ჩარტში მეორე ადგილს იკავებდა. Birds of a Feather-ზე გადაღებული მუსიკალური ვიდეო აილიშმა 2024 წლის სექტემბერში გამოუშვა. არტისტმა ოქტომბერში ეს სიმღერა Saturday Night Live-ის ეთერშიც შეასრულა.
ახლა აილიშს Hit Me Hard and Soft-ის ტურისგან შესვენება აქვს. ტურის ჩრდილოეთ ამერიკული ნაწილი 21 დეკემბერს, ლოს-ანჯელესის Kia Forum-ის არენაზე ხუთდღიანი გამოსვლით დასრულდა. არტისტი კონცერტების სერიას თებერვალში ავსტრალიაში განაახლებს. ავსტრალიის შოუები თებერვალსა და მარტში გაიმართება, ხოლო აპრილში ტურნე ევროპაში გადაინაცვლებს.
იხილეთ Interscope-ის განცხადება, რომლითაც ლეიბლმა მსმენელს Birds of a Feather-ის წარმატება აუწყა:
