კენდრიკ ლამარი Apple Music-ის Super Bowl Halftime Show-ზე გამოსასვლელად ემზადება და თან ერთი მეგობარი მიჰყავს.
ხუთშაბათს ლამარმა Apple Music-თან ერთად 9 თებერვლის შოუს თიზერი გაავრცელა. კლიპში კი რეპერმა სწორედ იმ ერთი მეგობრის ვინაობა გაამხილა, რომელთან ერთადაც „სუპერდოუმის” სცენაზე წარდგება და ეს არის SZA.
ამ ეტაპზე უცნობია, რას შეასრულებენ მუსიკალური პარტნიორები სცენაზე, რადგან მათ არაერთი დუეტი აქვთ, მათ შორის 30 for 30, Luther, Gloria, All the Stars და Doves in the Wind.
2022 წელს კენდრიკი თავად იყო სპეციალური სტუმარი სნუპ დოგისა და Dr. Dre-ს Super Bowl Halftime Show-ზე ლოს-ანჯელესში. ახლა კი უკვე მისი ჯერია, ჰედლაინერის პოსტი დაიკავოს. „რეპი დღემდე რჩება მუსიკის ყველაზე გავლენიან ჟანრად,” – თქვა ლამარმა სექტემბერში, როცა ცნობილი გახდა, რომ Super Bowl-ის სცენაზე სწორედ ის წარდგებოდა. „და მე იქ ვიდგები, რათა მსოფლიოს შევახსენო, თუ რატომ.”
2024 ლამარისთვის წარმატებული წელი იყო, თუმცა, როგორც ჩანს, 2025-ში მისი წარმატება კიდევ ახალ მასშტაბებს მიაღწევს. თებერვალი რეპერისთვის დატვირთული თვე იქნება. ის გრემის შვიდ ნომინაციაშია წარდგენილი და, სავარაუდოდ, სახლში რამდენიმე ჯილდოს წაიღებს, სანამ ახალი ორლეანისკენ გაემართება.
Super Bowl-ის შემდეგ კი კენდრიკ ლამარი და SZA ერთობლივი Grand National Tour-ის ფარგლებში ჩრდილოეთ ამერიკული კონცერტების სერიას აპრილში დაიწყებენ.
ნახეთ Super Bowl Halftime Show-ზე ლამარისა და SZA-ს ერთობლივი გამოსვლის თიზერი:
