ნიკ კეივმა უკვე აირჩია საკუთარი დაკრძალვის საუნდტრეკი და, როგორც ჩანს, ეს მისია კანიე უესტს დაეკისრა.
კეივმა ამის შესახებ თავის ვებსაიტზე, Red Hand Files-ზე დაწერა, სადაც ის ფანების გაგზავნილ წერილებს პასუხობს. ამჯერად მან ორ წერილს უპასუხა. პირველი, რომლის ავტორია ჰელენი დიდი ბრიტანეთიდან, ეხებოდა მუსიკოსის გამოჩენას ბიბისი რადიოს პროექტში Desert Island Discs, სადაც სტუმრები ირჩევენ იმ სიმღერებს, რომლებსაც უკაცრიელ კუნძულზე წაიღებდნენ. კეივის არჩევანი კი ასე გამოიყურებოდა: ბობ დილანი და ჯონი ქეში, T. Rex, ნინა სიმონე, ჯონ ლი ჰუკერი, კარენ დალტონი, ტიმ როსი, კანიე უესტი და The Saints.
ჰელენი კეივს ეკითხებოდა, თუ როგორ ართმევდა თავს საკუთარ თავთან ჰიპოთეტურ შეკითხვებს დანაკარგსა და დანაშაულთან დაკავშირებით. მეორე კითხვა კი დამიანს ეკუთვნოდა აშშ-დან, რომელსაც აინტერესებდა, თუ რომელ სიმღერას აირჩევდა კეივი საკუთარი დაკრძალვისთვის.
გულშემატკივრებს ავსტრალიელმა მუსიკოსმა ერთი წერილით უპასუხა. მას შემდეგ, რაც, ელენის კითხვის საპასუხოდ, ვრცლად ისაუბრა გლოვის საკუთარ გამოცდილებაზე, კეივმა ბოლო წინადადებით დამიანის კითხვასაც უპასუხა: „ჰო, დამიან, კანიე უესტის I Am A God, თუ შეიძლება.”
ეს არ არის პირველი შემთხვევა, როცა კეივმა თავისი სიმპათია გამოხატა უესტის მიმართ. 2020 წელს ასევე Red Hand Files-ის პასუხებში მან კანიეს „ჩვენი ყველაზე დიდი არტისტი” უწოდა.
