ბიონსეს Cowboy Carter-მა 2025 წლის გრემის დაჯილდოებაზე საუკეთესო ქანთრი ალბომის ჯილდო მიიღო. ამ გამარჯვებით, ბიონსე გახდა პირველი შავკანიანი ქალი, რომელმაც ამ კატეგორიაში გრემი მოიპოვა.
ჯილდო გამარჯვებულს ტეილორ სვიფტმა გადასცა. მან სცენაზე გამოსვლისას აღნიშნა: „ამბობენ, რომ არასდროს გავიწყდება, საიდან მოდიხარ და მე არასდროს დამავიწყდება, რომ ზუსტად ამ ადგილას, თითქმის 15 წლის წინ, წლის საუკეთესო ქანთრი ალბომისთვის გრემი მივიღე. ეს დიდი პატივია, რომელიც ისეთ დიდებულ არტისტებს ხვდათ წილად, როგორებიც არიან: The Chicks, ჯონი ქეში, ლორეტა ლინი, ჯორჯ სთრეიტი, ფეიტ ჰილი, ვინს გილი, ელისონ კრაუსი და შანია ტვეინი.“
ამის შემდეგ სვიფტმა გამარჯვებულად ბიონსე გამოაცხადა, რის შემდეგაც დარბაზში ოვაციები გაისმა. ბიონსე ფეხზე წამოდგა, თავის მეუღლეს, ჯეი-ზის და ქალიშვილს, ბლუ აივის გადაეხვია, შემდეგ კი ჯილდოს ასაღებად სცენაზე ავიდა.
სცენაზე სვიფტს მიესალმა და დარბაზს მიმართა: „ღმერთო ჩემო… მინდა, პირველ რიგში, ღმერთს გადავუხადო მადლობა იმისთვის, რომ ამდენი წლის შემდეგაც ისევ ვაკეთებ იმას, რაც ასე ძალიან მიყვარს. განსაკუთრებული მადლობა მინდა გადავუხადო ქანთრი მუსიკის შემსრულებელ ყველა იმ არტისტს, ვინც ამ ალბომს კეთილგანწყობით შეხვდა. ჩვენ მართლაც უდიდესი შრომა ჩავდეთ მასში. ვფიქრობ, ზოგჯერ ჟანრი უბრალოდ სიტყვაა, რომელიც ჩვენ, არტისტებს, ჩარჩოებში გვამწყვდევს. მინდა, ყველამ გაბედოს იმის გაკეთება, რაც უყვარს და არასდროს შეეშინდეს მიზნისკენ სვლის.“
ბიონსემ მადლობა გადაუხადა თავის ოჯახს და Cowboy Carter-ზე მომუშავე კოლეგებს: „ამ ალბომს თქვენ გარეშე ვერ შევქმნიდი,“ — მიმართა არტისტმა თავის გულშემატკივრებსა და მსმენელებს. ბოლოს კი დაამატა: „ახლაც შოკში ვარ. უდიდესი მადლობა ამ პატივისთვის!”
Cowboy Carter გამოსვლისთანავე ორი კვირის განმავლობაში Billboard 200-ის ლიდერი იყო. ალბომის შექმნაში არაერთი არტისტი მონაწილეობდა, მათ შორის ქანთრი მუსიკის ისეთი ლეგენდები, როგორებიც არიან დოლლი პარტონი და უილი ნელსონი. ამასთანავე, ალბომი პატივს მიაგებს შავკანიან ქანთრი პიონერებს, მათ შორის ლინდა მარტელს და თანამედროვე შავკანიან ქანთრი შემსრულებლებს.
დაჯილდოების ამავე საღამოს ბიონსე გახდა პირველი შავკანიანი ქალი, რომელმაც ბოლო ხუთი ათწლეულის განმავლობაში გრემი ქანთრი მუსიკისათვის მოიპოვა. მან ჯილდო ასეგე მიიღო საირუსთან ერთად ჩაწერილი სიმღერისთვის — II Most Wanted. ნამუშევარმა წლის საუკეთესო ქანთრი დუეტის/ჯგუფის შესრულების კატეგორიაში გაიმარჯვა. ამ კატეგორიაში შავკანიან არტისტს გრემი ბოლოს 1975 წელს The Pointer Sisters-ს გადაეცა.
ბიონსე წელს გრემის დაჯილდოებაზე ყველაზე მეტი — 11 ნომინაციით იყო წარმოდგენილი. 2025 წლის გრემის ცერემონია CBS-ის პირდაპირ ეთერში გადაიცემოდა ლოს-ანჯელესის Crypto.com Arena-დან.
