უილ სმითმა Broken Record-ის პოდკასტში სტუმრობისას, თანაწამყვან ჯასტინ რიჩმონდთან საუბრისას გაამხილა, რომ The Notorious B.I.G.-სა და Prince-ს გარდაცვალებამდე ცოტა ხნით ადრე ესაუბრა. უილ სმითი B.I.G.-ის პირველად სწორედ იმ ღამეს შეხვდა, როცა რეპერი ლოს-ანჯელესში, ავტომობილიდან გასროლის შედეგად დაიღუპა.
„არც კი მინდა ამაზე ხმამაღლა ლაპარაკი, თითქოს რაღაც საშინელი წყევლაა. Biggie-ს მკვლელობამდე ოთხი საათით ადრე შევხვდი, Prince-ს კი გარდაცვალებამდე რვა საათით ადრე ვესაუბრე,“ – თქვა სმითმა და დაამატა, რომ Prince მასთან და ჯეი-ზისთან ბიზნეს იდეას განიხილავდა. „Prince მეუბნებოდა, რომ მე, მას და ჯეი-ზის ერთად გასართობი კომპანია უნდა დაგვეფუძნებინა. მითხრა, რომ ჯეისაც ესაუბრა და უნდოდა, ეს იდეა ერთად განგვეხორციელებინა,“ – გაიხსენა სმითმა. „იმ ღამეს ვისაუბრეთ, დილით კი ცოცხალი აღარ იყო. არ ვიცი, ეს ჩემთან დაკავშირებით რას ნიშნავს. ვფიქრობ – ღმერთო, არავინ დამირეკოს, არ დამირეკოთ.“
სმითმა ისიც აღნიშნა, რომ The Notorious B.I.G.-ის შემთხვევა განსაკუთრებით ემოციური იყო მისთვის. „Biggie-ს ამბავმა ამატირა,“ – თქვა უილ სმითმა რეპერის მკვლელობაზე საუბრისას. „ეს ძალიან მტკივნეული იყო. შემაშინა კიდეც.“
უილ სმითი ამჟამად მუშაობს თავის ახალი ალბომზე, სახელწოდებით Based on a True Story. ეს ალბომი მისთვის ბოლო 20 წლის განმავლობაში პირველი სტუდიური ნამუშევარია.
