ტომ უეიტსმა თავისი შემოქმედება ამჯერად იტალიურ დოკუმენტურ სერიალში გააჟღერა. მუსიკოსის ნამუშევრები Il Fattore Umano-ს (ადამიანის ფაქტორი) ბოლო ეპიზოდს აფორმებს, რომელიც ამერიკაში უსახლკარობის ისტორიებს აღწერს.
რვანაწილიან სერიალში, რომელიც იტალიურმა საზოგადოებრივმა ტელევიზიამ გადაიღო, გამოძიებულია ამბები, თუ როგორ ირღვეოდა ადამიანის უფლებები ავტოკრატიის, ავტორიტარული და დემოკრატიული რეჟიმების მიერაც კი. სერიალი ფოკუსირდება ყველაზე მოწყვლად ადამიანებსა და უმცირესობების წარმომადგენლებზე, რომლებიც საკუთარ ქვეყნებში ჩაგვრის მსხვერპლნი არიან. სერიალის ბოლო ეპიზოდი კი, სახელწოდებით Ultima Fermata (ბოლო გასეირნება), ღრმად იხედება ამერიკულ სიღარიბეში.
ეპიზოდში წარმოდგენილია სამხრეთის ოთხი შტატი – ტენესი, ალაბამა, მისისიპი და ლუიზიანა. ფილმის გადამღები ჯგუფი რეგიონებში საზოგადოებრივი ტრანსპორტით მოგზაურობს და აღმოაჩენს ღირსებასა და სოლიდარობას იმ საზოგადოებების, რომლებიც აიძულეს, ეცხოვრათ მარგინალიზებულ პირობებში, რადგან სისტემას უსაფრთხოების ქსელი არ გააჩნია.
სწორედ ამ ადამიანების ისტორიას სდევს თან ტომ უეიტსის ხმა, რომელიც აკუსტიკური გიტარისა და ფორტეპიანოს ფონზე ასრულებს სიმღერებს და ასევე კითხულობს თავის პოემას Seeds on Hard Ground. ეპიზოდის ტრეილერს ასევე ფონად სდევს მუსიკოსის ნაწარმოები The Fall of Troy.
„მე ვარ ადამიანი, რომელსაც ძალიან აწუხებს ყველა ის უსამართლობა, რომელშიც ვართ, მაგრამ ცუდად შეიარაღებულია იმისთვის, რომ რომელიმე მათგანი გადაჭრას,” – ამბობს მუსიკოსი განცხადებაში. „მე სამყაროს ვესაუბრები მხოლოდ იმ ერთი გზით, რომელიც ვიცი: ჩემი მუსიკით. მე არ ვერევი პოლიტიკასა თუ სამართალში და არ მაქვს პასუხები დიდ კითხვებზე, რომლებიც ყველას გვაწუხებს. ერთადერთი, რაც შემიძლია, ეს არის, რომ ვეცადო, ჩემი სიმღერებითა და პოეზიით, სხვას შთაგონება მივცე. მე აქ ვარ იმისთვის, რომ გავხსნა ფანჯარა და ასევე თქვენი თვალები მცირედით მაინც, თუ ამას შევძლებ.”
სერიალის ბოლო ეპიზოდი 26 თებერვალს გამოვა.
