ერთობლივი სინგლის შემდეგ ტომ იორკი და მარკ პრიჩარდი ამჯერად ალბომის გამოცემას აანონსებენ. პრიჩარდმა, რომელსაც ელექტრონული მუსიკოსობისა და პროდიუსერობის 30-წლიანი გამოცდილება აქვს, Radiohead-ისა და The Smile-ის სოლისტთან პირველად 2016 წელს ითანამშრომლა, როცა იორკმა Beautiful People-ის ვოკალი ჩაწერა.
წყვილი ერთმანეთს 2012 წელს, Radiohead-ის ტურნეს დროს ავსტრალიაში შეხვდა, სადაც ინგლისში დაბადებული პრიჩარდი მოღვაწეობს. მათი ბოლო ერთობლივი სიმღერის, Back in the Game-ის დებიუტი კი 2024 წელს, ისევ იორკის ავსტრალიურ ტურნეში შედგა. სიმღერა ოფიციალურად თებერვალში გამოვიდა და არსებული ინფორმაციით, ახალ ალბომშიც შევა. Tall Tales 9 მაისს გამოვა.
ალბომის დაანონსება დაემთხვა წყვილის ახალი სიმღერის გამოსვლას – This Conversation Is Missing Your Voice, რომელსაც თან ახლავს ჯონათან ზავადას მიერ გადაღებული ვიდეოკლიპი. კლიპი, ისევე, როგორც Back in the Game-ის ვიზუალი, არის ნაწილი ზავადას მიერ გადაღებული ფილმისა, რომლის ჩვენებაც უახლოეს მომავალში დაანონსდება.
„კარანტინის პერიოდში მარკმა MP3 ფაილების დიდი მოცულობა გამომიგზავნა,” – ამბობს იორკი. „იქ იმდენი შესანიშნავი რამ იყო, მაშინვე მივხვდი, რომ თავი უნდა დამენებებინა, რასაც იმ მომენტში ვაკეთებდი. ისეთი გრძნობა მქონდა, თითქოს ამ ადგილას აქამდე არასდროს ვყოფილვარ – მაშინ, როცა ყურსასმენებს ვიკეთებდი და ვოკალისა და სიტყვების პოვნას ვცდილობდი და მაშინაც, როცა ჯონათანი სრულიად სპონტანურად გამომეხმაურა თავისი ვიდეოების იდეებით. იღბლიანი ვარ, რომ ამ ყველაფერში მივიღე მონაწილეობა. ერთი სული მაქვს, როდის გამოვა საბოლოო შედეგი. Tall Tales ძალიან მნიშვნელოვანია ჩემთვის. იმედი მაქვს, ხალხი ამას მიხვდება.”
Tall Tales-ის გამოცემა ტომ იორკის განსაკუთრებით ნაყოფიერ წელიწადს მოჰყვება. 2024 წლის იანვარში The Smile-მა გამოუშვა მეორე ალბომი Wall of Eyes, რომელსაც ოქტომბერში მესამე ალბომი – Cutouts მოჰყვა. ჩანაწერები Billboard 200-ის 42-ე და 52-ე ადგილებზე მოხვდა. აპრილში კი იორკმა დენიელ ლუჩეტის ფილმის, Confidenza-ს საუნდტრეკიც გამოსცა.
