15 ივნისს კონსერვატორიის მცირე დარბაზში კამერული მუსიკის კონცერტი გაიმართება. მსმენელის წინაშე წარდგებიან პიანისტი თამარ ლიჩელი და ჩელისტი ლიზი რამიშვილი. მუსიკოსები ბრამსისა და რახმანინოვის ნაწარმოებებს შეასრულებენ. ბილეთების შეძენას შეძლებთ ბმულზე.
თამარ ლიჩელი:
„პროგრამაშია ორი შედევრი: ბრამსის პირველი სონატა ჩელოსა და ფორტეპიანოსთვის და რახმანინოვის სონატა ჩელოსა და ფორტეპიანოსთვის. ორივე ნაწარმოები გამოირჩევა სირთულით და ასევე იმით, რომ ისინი განსაკუთრებით უყვარს მსმენელს. ბრამსის სონატა, როგორც მთელ მის შემოქმედებას ახასიათებს, ძალიან ღრმა არის, რახმანინოვის სონატა კი – უსაშველოდ ლამაზი და ემოციური. ორივე, ასე ვთქვათ, მწვერვალია კამერული ჟანრის. მე განსაკუთრებით მიხარია, რომ ვუკრავ ფანტასტიკურ მუსიკოსთან ერთად. ლიზასთან ყოველი შემოქმედებითი თანამშრომლობა გამორჩეულია, რადგან ჩვენ განსაკუთრებული თანხვედრა გვაქვს მუსიკალურ აზროვნებაში, რაც დიდი იშვიათობაა. ეს კი ორივეს ძალიან გვახარებს, რადგან რეპეტიციებზე გარკვეულ დეტალებზე ლაპარაკი არც კი გვიწევს ხოლმე, იმდენად ერთნაირად ვგრძნობთ მუსიკას და მე მგონია, რომ ამას მსმენელიც აუცილებლად იგრძნობს.”
ოქტომბერში თამარ ლიჩელის ორგანიზებით თენგიზ ამირეჯიბის სახელობის პიანისტთა საერთაშორისო კონკურსი გაიმართება. ღონისძიებას 21-24 ოქტომბერს, ტრადიციულად, ბორჯომი უმასპინძლებს.
