Tyler, the Creator პირველად გამოჩნდება სრულმეტრაჟიან ფილმში – Marty Supreme, რომლის რეჟისორიც ჯოშ საფდიაა. ფილმი A24-ის პროდუქციაა და მისი პირველი ტრეილერი 13 აგვისტოს გამოქვეყნდა.
კინოსურათში მთავარ როლებს ტიმოთი შალამე და გვინეტ პელტროუ ასრულებენ. ფილმი მოგვითხრობს მარტი მაუზერზე (შალამე). ის პინგ-პონგის დამწყები მოთამაშეა, რომელიც დიდებისკენ მიისწრაფვის მიუხედავად იმისა, რომ მისი სპორტული წარმატების თითქმის არავის სჯერა. მოქმედება 1950-იან წლებში ვითარდება. მაუზერი ყველაფერს აკეთებს იმისათვის, რომ ოცნება რეალობად აქციოს.
ტრეილერში Tyler, the Creator რამდენიმე მოკლე სცენაში ჩნდება: ერთ ეპიზოდში ის მართავს მანქანას, რომლითაც შალამეს პერსონაჟიც მგზავრობს და დიდი გამარჯვების შემდეგ მოგებულ ფულს ითვლის.
Marty Supreme ჯოშ საფდიას პირველი სარეჟისორო ნამუშევარია 2019 წლის ფილმის, Uncut Gems-ის შემდეგ. Marty Supreme-ისათვის მან მრავალფეროვანი სამსახიობო შემადგენლობა შეკრიბა, მათ შორის არიან Tyler, the Creator, Shark Tank-ის კევინ ო‘ლირი, ფრენ დრეშერი, ილუზიონისტი პენ ჯილეტი, აბელ ფერარა და ოდესა აზიონი.
გამოცემა Deadline-ის ინფორმაციით, ფილმის სიუჟეტი პროფესიონალი პინგ-პონგის მოთამაშის, მარტი რაისმენის ისტორიას ეყრდნობა.
Marty Supreme-ის პრემიერა ამერიკის კინოთეატრებში შობას, 2025 წლის 25 დეკემბერს შედგება.
