21 აგვისტოს ტეილორ სვიფტის ვებ-გვერდზე დროის ათვლა დაიწყო, რაც დაანონსებული ალბომის – The Life of a Showgirl-ის მეორე ვინილის ვერსიას უკავშირდება. The Life of a Showgirl სვიფტის მეთორმეტე სტუდიური ალბომია, რომელიც 3 ოქტომბერს გამოვა. ალბომის ალტერნატიული ვინილის ვერსია, სახელწოდებით Baby, That’s Show Business ორ ფერშია წარმოდგენილი – „lovely bouquet orange“ (ნარინჯისფერი) და „lakeside beach blue“ (ლურჯი). შეფუთვაში შედის ექსკლუზიური ფოტოები და თავად ტეილორ სვიფტის პოეზია.
ფანებმა უნდა გაითვალისწინონ, რომ ახალი ვერსიის შეძენა მხოლოდ ორი დღის განმავლობაშია შესაძლებელი. სვიფტის ვებ-გვერდზე მითითებულია, რომ ის ხელმისაწვდომია მხოლოდ მომდევნო 48 საათით, მარაგის ამოწურვამდე.
დროის ათვლის აღმნიშვნელი სიმბოლოები The Life of a Showgirl-ის პრომო კამპანიის ერთ-ერთ მთავარ ელემენტად იქცა. პირველად წამზომი სვიფტის ვებ-გვრდზე, ნარინჯისფერ ფონზე გამოჩნდა მანამდე, სანამ New Heights-ის პოდკასტის თიზერში მომღერალი ალბომის გამოსვლას დააანონსებდა. New Heights-ის ამავე ეპიზოდში, რომელიც სრულად 13 აგვისტოს გამოვიდა, არტისტმა The Life of a Showgirl-ის შესახებ მეტი დეტალი გაამხილა, მათ შორის მთავარი ყდის დიზაინი და სიმღერების სია. ალბომის შექმნისას სვიფტმა პროდიუსინგზე მაქს მარტისთან და Shellback-თან ითანამშრომლა. ჩანაწერში ასვე შესულია დუეტი საბრინა კარპენტერთან.
„[ალბომი] ბევრად უფრო ენერგიულია და ბევრად მეტი სახალისო პოპ-ემოცია მოაქვს. ჩემი მთავარი მიზანი იყო, შემექმნა ისეთი მელოდიები, რომლებიც იმდენად გადამდებია, რომ ცოტათი გაღიზიანდები კიდეც,” – აღნიშნა სვიფტმა პოდკასტში.
