ბილი აილიშის მაიამის კონცერტზე მომხდარი უსიამოვნო შემთხვევის შემდეგ, მისი ერთ-ერთი ფანი ინტერნეტ სივრცეში პოპულარული გახდა.
გასულ კვირას 18 წლის ანაია, რომელიც შოუს ესწრებოდა, ყურადღების ცენტრში აღმოჩნდა. Kaseya Center-ში გამართულ შოუზე ერთ-ერთმა მაყურებელმა აილიშს ხელი ჩაჰკიდა და ბარიერებზე მიანარცხა. შემთხვევა არაერთ ვიდეოში დააფიქსირეს. ამ დროს, როცა დაცვას ის ადგილიდან გაჰყავდა, ახალგაზრდა ფანი დაედევნა თავდამსხმელს და უსაყვედურა.
რამდენიმე დღეში, აილიშმა ანაიას მადლობის ნიშნად ჰუდი და სხვა საჩუქრები გაუგზავნა. ანაიამ ინსტაგრამის Story-ში ფოტო გააზიარა, წარწერით – „დიდი მადლობა საჩუქრებისთვის, ბილი!!!“
ბილი აილიში პირველი არ არის, ვინც ანაიას გამბედაობა აღნიშნა – სულ რამდენიმე დღეში, აილიშის 18 წლის მსმენელმა TikTok-ზე ნახევარ მილიონზე მეტი გამომწერი მოიპოვა. მომღერლის ფანებმა მას საქციელისთვის მადლობა გადაუხადეს. ინციდენტის შემდეგ ბილის ძმამ, ფინეასმაც მონიშნა ანაია თავის ინსტაგრამის Story-ში და მისი სიმამაცე შეაქო. პოპვარსკვლავს თავად საჯაროდ არ უსაუბრია მომხდარზე, თუმცა ადგილობრივმა პოლიციამ ABC News-ს დაუდასტურა, რომ აგრესიული მაყურებელი დაუყოვნებლივ გააძევეს Kaseya Center-იდან. შემდგომი სამართლებრივი ზომები მიღებული არ ყოფილა.
მაიამიში კონცერტების სერია უკვე დასრულდა. აილიშის ტურნე Hit Me Hard and Soft, რომელიც 2024 წლის სექტემბერში დაიწყო, ორლანდოში, Kia Center-ში 14 ოქტომბერს გაგრძელდება.
