ბიონსემ პატივი მიაგო D’Angelo-ს, ნეოსოულის პიონერს, რომელიც 14 ოქტომბერს პანკრეასის სიმსივნით გარდაიცვალა.
„მშვიდად განისვენე, მაიკლ იუჯინ არჩერ, მსოფლიოში ცნობილი, როგორც განუმეორებელი D’Angelo,” – დაწერა მომღერალმა თავის ვებგვერდზე და მუსიკოსის შავ-თეთრი ფოტო გააზიარა. „მადლობას გიხდით ლამაზი მუსიკისთვის, შენი ხმისთვის, საფორტეპიანო ვირტუოზობისა და შენი ხელოვნებისთვის. შენ ნეოსოულის პიონერი იყავი და სამუდამოდ შეცვალე რითმი და ბლუზი. არასოდეს დაგივიწყებთ.”
D’Angelo-ს ოჯახმა „ბილბორდთან” დაადასტურა, რომ მუსიკოსი სამშაბათს, 14 ოქტომბერს, 51 წლის ასაკში გარდაიცვალა.
„ჩვენი ოჯახის კაშკაშა ვარსკვლავი ამ ცხოვრებაში ჩაქრა. სიმსივნესთან ხანგრძლივი და მამაცი ბრძოლის შემდეგ, გულისტივილით ვაცხადებთ, რომ მაიკლ დიანჯელო არჩერი, ცნობილი, როგორც D’Angelo, 2025 წლის 14 ოქტომბერს გარდაიცვალა. ვწუხვართ, რომ მან მხოლოდ ძვირფასი მოგონებების დატოვება შეძლო ოჯახისთვის, თუმცა უსასრულოდ მადლიერი ვართ იმ გასაოცარი მუსიკალური მემკვიდრეობისთვის, რაც მან მსოფლიოს დაუტოვა. გთხოვთ, ამ რთულ დროს პატივი სცეთ ჩვენს პირად სივრცეს, თუმცა გიწვევთ, შემოგვიერთდეთ მისი გარდაცვალების გლოვაში, ამავდროულად კი ვიზეიმოთ ის მუსიკალური ძღვენი, რაც მან მსოფლიოს აჩუქა.”
R&B ლეგენდის გარდაცვალებას პოსტი მიუძღვნა Tyler, the Creator-მაც. რეპერმა სოციალურ ქსელში გააზიარა ამბავი, თუ როგორ იყიდა თავის მე-9 დაბადების დღეზე შეგროვებული 20$-ით სწორედ D’Angelo-ს 2000 წელს გამოსული მეორე ალბომი Voodoo.
„Cita-ს სამყაროში დაუსრულებლად ჟღერდა Left&Right; Brown Sugar ოჯახის განუყოფელი ნაწილი გახდა და სახლში მუდმივად ისმოდა ლორენ ჰილის Nothing Even Matters. ასე რომ, ეჭვი არ მეპარებოდა, რომ Voodoo ჩემს მოლოდინებს გაამართლებდა. თუმცა წარმოდგენა არ მქონდა, რომ ის ჩემს მუსიკალურ დნმ-ს ჩამოაყალიბებდა,” – წერს ტაილერი. „რა რაოდენობის რეპი მაქვს დაწერილი მის Booty-ზე იმ წელს, რამდენჯერ მიცდია Send It On-ის ვოკალის გამეორება, რამდენი ნაკაწრი გაუჩნდა დისკს იმის გამო, რომ The Root-ს განუწყვეტლად ვამეორებდი…. ძალიან ბევრი.”
რეპერმა ასევე დაწერა, თუ როგორ შთააგონა Voodoo-ს ერთ-ერთმა სიმღერამ One Mo’Gin-მა Ring Ring Ring-ის შექმნა, რომელიც ტაილერის ბოლო, Billboard 200-ის ლიდერ ალბომში, Don’t Tap the Glass-შია შესული.
