შვიდწლიანი პაუზის შემდეგ Radiohead სცენას დაუბრუნდა. ბენდმა კონცერტი 4 ნოემბერს მადრიდის Movistar Arena-ზე გამართა. მუსიკალურმა პროგრამამ საკულტო ჯგუფის კარიერა მოიცვა და არაერთი ჰიტი გააერთიანა.
მოლოდინი დიდი იყო – 20-დღიანი ტურის პირველი კონცერტის ბილეთები სრულად გაიყიდა. ოქსფორდში ჩამოყალიბებული ბენდი ტურნეს ფარგლებში დიდი ბრიტანეთისა და ევროპის ქალაქებს ეწვევა, მათ შორის ოთხი ღამის განმავლობაში შოუს ლონდონის O2 Arena-ზე გამართავს. კონცერტები ასევე ჩატარდება მადრიდში, ბოლონიაში, კოპენჰაგენში და ბერლინში ნოემბერ-დეკემბერში.
2018 წლის ზაფხულის შემდეგ ეს იყო პირველი შემთხვევა, როცა ბენდი სცენაზე სრული შემადგენლობით გამოვიდა. ტურნეს დაანონსების შემდეგ დრამერმა ფილიპ სელვეიმ პრესრელიზში განმარტა, რას ნიშნავდა ჯგუფის წევრებისთვის კვლავ გაერთიანება:
„გასულ წელს, უბრალოდ ვიკრიბებოდით რეპეტიციებისთვის, სულ ეს იყო. შვიდწლიანი პაუზის შემდეგ ძალიან სასიამოვნო აღმოჩნდა სიმღერების დაკვრა და მუსიკალურ იდენტობასთან დაბრუნება, რომელიც თითოეულ ჩვენგანს უკვე შიგნიდან აქვს გამჯდარი,” – თქვა მან.
Radiohead-მა ბოლო მსოფლიო ტურნე 2016 წლის ალბომის – A Moon Shaped Pool-ის მხარდასაჭერად მოაწყო. ალბომი ბრიტანეთის ოფიციალურ ჩარტებში პირველ ადგილზე იყო, ხოლო Billboard 200-ში – მე-3 ადგილზე. ჯგუფი 2017 წელს Coachella-ს ჰედლაინერიც იყო.
ამ წლების განმავლობაში ყოველი წევრი აქტიურად აგრძელებდა მუშაობას და ჩანაწერების გაკეთებას, განსაკუთრებით ტომ იორკი და გიტარისტი ჯონი გრინვუდი, რომლებმაც დრამერ თომ სკინერთან ერთად შექმნეს ჯგუფი – The Smile და გამოუშვეს სამი სტუდიური ალბომი. ბოლო წელს Radiohead-ის აქტივობა გაიზარდა 2003 წლის Hail to the Thief-ის განახლებული ვერსიით, რომელიც მანჩესტერის „ჰამლეტის” წარმოებაში იყო გამოყენებული.
ბოლო ინტერვიუში ფრონტმენმა ტომ იორკმა გაიხსენა A Moon Shaped Pool-ის მხარდასაჭერი ტურნეს გამოცდილება: „გადაღლილობა ძალიან იგრძნობოდა, ამიტომ გავჩერდით. კონცერტები მშვენიერი იყო, მაგრამ გვქონდა განცდა, რომ უნდა შევჩერებულიყავით,” – აღნიშნა ტომ იორკმა.
მან ასევე ისაუბრა პირად ტრაგედიაზე, – მისი პირველი ცოლის, რეიჩელ ოუენის გარდაცვალებაზე 2016 წლის ბოლოს. შემთხვევამდე ერთი წლით ადრე იორკი და ოუენი ერთმანეთს დაშორდნენ. ტომ იორკმა გაამხილა, რომ შემოქმედებითი პაუზა აუცილებელი იყო, რათა გლოვისთვის დრო და პირადი სივრცე ჰქონოდა.
Radiohead აღდგენილი ძალებით მადრიდის სცენაზე ენერგიულად წარდგა. ბენდმა 25 სიმღერა შეასრულა, რომლებიც მოიცავდა მათ ცხრა სტუდიურ ალბომს. კონცერტი გაიხსნა სიმღერით Let Down 1997 წლის OK Computer-იდან, რომელიც ბოლო თვეებში სტრიმინგის სენსაციად იქცა და აგვისტოში Billboard Hot 100-ის 91-ე ადგილიც დაიკავა, რაც ჯგუფის პირველი ხილვადობა იყო ჩარტში 2008 წლის Nude-ის შემდეგ.
მუსიკალური პროგრამა, შესაძლოა, შოუების მიხედვით შეიცვალოს. მადრიდის კონცერტზე შესრულებულ სიმღერებს შორის იყო რამდენიმე დიდი ჰიტი, მაგალითად Karma Police. თუმცა ბენდმა გამოტოვა რამდენიმე ყველაზე ცნობადი სიმღერა, მათ შორის Creep 1994 წლის Pablo Honey-დან.
იხილეთ მადრიდის Movistar Arena-ზე გამართული შოუს გაბმავლობაში შესრულებული სიმღერების სრული ჩამონათვალი:
Let Down
2 + 2 = 5
Sit Down. Stand Up
Bloom
Lucky
Ful Stop
The Gloaming
Myxomatosis
No Surprises
Videotape
Weird Fishes/Arpeggi
Everything in Its Right Place
15 Step
კონცერტზე ბენდმა ასევე შეასრულა: The National Anthem, Daydreaming,A Wolf at The Door, Bodysnatchers, Idioteque, Fake Plastic Trees, Subterranean Homesick Alien, Paranoid Android, How to Disappear Completely, You and Whose Army?, There There და Karma Police.
