9 იანვარს Mono Hall-ში ქართველი ანონიმური არტისტის, Mamaflex-ის ლაივი გაიმართა. არტისტი სცენაზე ბენდის – DE COLLECTIVE-ის თანხლებით წარდგა. ლაივზე გამხსნელი აქტი SUPERBLOND-მა შეასრულა.
Mamaflex მუსიკალურ სივრცეში პირველად 2018 წელს გამოჩნდა. მისი პირველი ტრეკი იმავე წელს გამოქვეყნდა და მალევე მოიპოვა პოპულარობა საქართველოში. არტისტის მუსიკა აერთიანებს ექსპერიმენტულ ტრეფს და ჰიპ-ჰოპის ჟღერადობას. ის საკუთარ იდენტობას მალავს – მუსიკალურ ვიდეოებში და ლაივებზე ყოველთვის ნიღბით ჩნდება.
Mamaflex ქართულ მუსიკალურ სცენაზე ის იშვიათი შემთხვევაა, როდესაც არტისტის თითქმის ყველა ტრეკი ჰიტად იქცევა. ნამუშევრების პოპულარობას მნიშვნელოვნად განაპირობებს TikTok-ის ტრენდებიც.
2025 წლის შემოდგომაზე Mamaflex-ის მუსიკა ლონდონის მოდის კვირეულზე გაჟღერდა, როცა KEBURIA-ს მოდის სახლმა კოლექცია სწორედ მისი ნამუშევრების ფონზე წარადგინა. ჩვენებაზე დიზაინერმა გიორგი ქებურიამ მუსიკალურ გაფორმებად Mamaflex-ის რამდენიმე ჰიტი გამოიყენა. შოუზე გაჟღერებულ კომპოზიციებს შორის იყო „Korupto“, რომელიც 2025 წლის ივლისში გამოქვეყნდა.
Mono Hall-ში გამართული ლაივი DE COLLECTIVE-თან ერთად მუსიკალურად მრავალფეროვანი იყო. ელექტრონული გიტარის, ბას-გიტარისა და დრამის ჟღერადობის ინტეგრირებით, მსმენელმა Mamaflex-ის რამდენიმე ტრეკის ალტერნატიული ვერსიაც მოისმინა. ლაივზე შესრულდა ისეთი ნამუშევრები, როგორებიცაა: „Trigan“, „Dead at 29“, „Korupto“, „007 No Master“, „BMF“, „Gato Bandido“ და სხვა.
