16 ივლისს საქართველოს რიკი მარტინი ეწვევა. პოპვარსკვლავი ქართველი მსმენელის წინაშე კონცერტს პირველად გამართავს. შოუ რუსთავის საერთაშორისო ავტოდრომზე შედგება.
საქართველო მომღერლის საერთაშორისო ტურნეს ერთ-ერთი გაჩერებაა, რომლის ფარგლებშიც მარტინი მსმენელს საკუთარი რეპერტუარის ყველაზე ცნობილ და ენერგიულ ჰიტებს წარუდგენს, როგორებიცაა მისი სავიზიტო სიმღერები: Livin’ la Vida Loca, რომელმაც 5 კვირა გაატარა Billboard Hot 100-ის ლიდერ პოზიციაზე, ასევე Maria, Nobody Wants to Be Lonely და სხვები. ჯამში მარტინს Billboard Hot 100-ის 16 სიმღერა და Billboard 200-ის ცხრა ალბომი აქვს, რომელთაგანაც ალბომი Ricky Martin ჩარტის პირველი ადგილის მფლობელი გახდა.
1991 წლის სადებიუტო სოლო ალბომის გამოცემის შემდეგ მომღერალმა 95 მილიონზე მეტი ჩანაწერი გაყიდა, მოიპოვა პლატინის არაერთი სერტიფიკატი და გახდა ორი გრემისა და ხუთი ლათინური გრემის მფლობელი. წელს რიკი მარტინი Bad Bunny-ს ცნობილ Super Bowl Halftime Show-ზეც წარდგა.
რიკი მარტინთან ერთად საქართველოს ეწვევა მომღერალი ნატალი იმბრულიაც, რომელიც კონცერტზე სპეციალური სტუმრის სტატუსით წარდგება.
იმბრულიამ საერთაშორისო აღიარება 1997 წელს მოიპოვა სადებიუტო ალბომით Left Of The Middle. მისი ჰიტი Torn ჩარტების სათავეში მოექცა და ავსტრალიის რადიოებში 1990 წლის შემდეგ ყველაზე ხშირად გაშვებული სიმღერა გახდა . თავად ალბომი კი მსოფლიოში 7 მილიონზე მეტ ეგზემპლარად გაიყიდა.
ბილეთების შეძენა შესაძლებელია ბმულზე.
