Quemmekh-მა და Mishvardi-მ ერთობლივი ნამუშევარი, სახელწოდებით Kundera წარადგინეს. ტრეკში ორი განსხვავებული არტისტის ხედვა ერთმანეთს მოულოდნელად, ყოველგვარი წინაპირობის გარეშე შეხვდა.
კოლაბორაციის იდეა სპონტანურად გაჩნდა. როგორც არტისტები იხსენებენ, პროცესი უფრო მუსიკალურ თავგადასავალს ჰგავდა, ვიდრე წინასწარ გაწერილ გეგმას.
Mishvardi:
„Quemekh მოვიდა, მოდი, ვიკაიფოთო და მეც ვიკაიფე. წინაპირობა არ ყოფილა. პირველ პაემანს უფრო ჰგავდა ეს ყველაფერი“.
Quemmekh-ის თქმით, მათ მუსიკალური ექსპერიმენტებისა და ჟანრების სინთეზის სიყვარული აერთიანებთ. სწორედ ამან მისცა საშუალება, მრავალი იდეიდან ის კონკრეტული მელოდია და შინაარსი შეექმნათ, რომელიც ორივე მათგანს გამოხატავს.
Quemmekh:
„ახალი და ტრადიციული ჟანრების სინთეზი ალბათ ის საერთო ხაზია, რამაც მუსიკალურად გაგვაერთიანა. ბევრი სხვადასხვა იდეის მოსინჯვის მერე უბრალოდ იმ მელოდიაზე და შინაარსზე შევჯერდით, რომელიც ამ იდეებში ყველაზე მეტად მოგვეწონა. ტექსტისა და ინტონაციის ინტერპრეტაცია ინდივიდუალურია და მსმენელზეა დამოკიდებული, თუ რას აღმოაჩენს მასში.”
როგორც Billboard Georgia-სთან საუბრისას Quemmekh და Mishvardi ამბობენ, სამუშაო პროცესი, რომელიც თავიდან სპონტანურად დაიწყო, საბოლოოდ ძალიან ორგანულ გამოცდილებად იქცა. არტისტების თქმით, ამ პროცესისგან ბევრი რამ ისწავლეს და მათთვის შედარებით უცხო ტერიტორიებზე მოსინჯეს თავი.
„ვისწავლეთ, ან კიდევ ერთხელ გავიხსენეთ, რომ მნიშვნელობა არ აქვს, რა ჟანრის წარმომადგენელი ხარ, მძიმე მეტალს უკრავ თუ აფხაზურ ჰიპ-ჰოპს იგონებ – კოლაბორაციისას მთავარია, რომ არტისტებს მუსიკა ერთნაირად უყვარდეთ და ყველაფერი მარტივად და შესანიშნავად გამოვა,” – ამბონს Quemmekh.
არტისტების თქმით, აუდიტორიამ ნამუშევარი კარგად მიიღო. მსმენელთა უმრავლესობისთვის ეს აღმოჩნდა მოულოდნელი კოლაბორაცია, რომლითაც სასიამოვნოდ გაკვირვებული დარჩა.
