ახალი სიმღერის – SS26-ის გამოშვების შემდეგ, Charli xcx მსმენელებს თავისი უახლესი ალბომიდან კიდევ ერთი ახალი სინგლის ნაწყვეტს უზიარებს.
23 მაისს არტისტმა სოციალურ ქსელში ტრეკი Playboy Bunny გამოაქვეყნა. „ეს არის ვიდეო სიმღერისთვის Playboy bunny, რომელიც SS26-ის გადაღების მომდევნო დღეს გადავიღეთ. მართალი გითხრათ, საშინელი ნაბახუსევი მქონდა,” – დაწერა ჩარლიმ პოსტის აღწერაში.
მინიმალისტურ, შავ-თეთრ მუსიკალურ ვიდეოში პოპვარსკვლავი პარიზის ქუჩებში სეირნობს და ეიფელის კოშკის ფონზე პოზირებს.
Playboy Bunny-ს ვიდეოს ნახვა მხოლოდ ინსტაგრამზეა შესაძლებელი, თავად სიმღერა კი SS26-ის ლიმიტირებული ტირაჟის ვინილზე გამოიცემა. აღსანიშნავია, რომ Playboy Bunny მუსიკოსმა თავის მეორე ინსტაგრამ ანგარიშით – B-side-ის მეშვეობით გაავრცელა.
„მიზეზი, რის გამოც ეს ორი სიმღერა [SS26 და Playboy Bunny] ერთმანეთთანაა დაკავშირებული, არის ის, რომ ისინი გარკვეულწილად სრულიად ურთიერთსაპირისპიროა და მთავარი კონცეფციაც სწორედ ეს არის.”
მან ასევე აღნიშნა, რომ B-side-ზე გამოქვეყნებული ტრეკები სტრიმინგ პლატფორმებზე არასდროს აიტვირთება, თუმცა შესაძლოა, მომავალში ეს გადაწყვეტილება შეიცვალოს.
მაისის დასაწყისში ჩარლიმ გააზიარა სინგლი I Keep On Thinking Bout You Every Single Day and Night, რომელიც ვინილის მეორე მხარეს, ე.წ. B-side-ზე გამოვიდა.
21 მაისს ჩარლიმ თავისი ახალი სიმღერა SS26 და მასზე გადაღებული მუსიკალური ვიდეო წარადგინა, სადაც არტისტი პარიზის პოდიუმებზე მოდის სახლების სამოსით დადის. ვიდეო Rock Music-ის გავრცელებიდან ორი კვირის შემდეგ გამოვიდა.
რაც შეეხება ჩარლის მეშვიდე სტუდიურ ალბომს, მას ჯერჯერობით არც სახელწოდება აქვს და არც გამოსვლის თარიღია ცნობილი.
2024 წლის წარმატებული ალბომის, Brat-ის შემდეგ Charli xcx-მა სინგლი Rock Music დააანონსა, რაც საცეკვაო ჟანრიდან როკზე გადასვლის განზრახვა იყო: „მგონია, რომ საცეკვაო მოედანი მკვდარია, ასე რომ, ახლა ჩვენ როკმუსიკას ვქმნით,” – განაცხადა არტისტმა.
ორივე ტრეკი – Rock Music და SS26 ჩარლის დაანონსებულ, ჯერ კიდევ უსათაურო ალბომში შევა.
