21 ივნისს თბილისს ტომ ოდელი ეწვევა. ბრიტანელი მუსიკოსი კონცერტს „ლოკო პარკში” გამართავს. კონცერტამდე რამდენიმე დღით ადრე კი ორგანიზატორები საბოლოო პროგრამასა და ღონისძიებაზე მოქმედ წესებს აზიარებენ.
ტერიტორიაზე კარი 16:00 საათზე გაიხსნება. ოდელის გამოსვლამდე, 20:20 საათზე სცენას ქართული ჯგუფი „არა” დაიკავებს. საღამოს მთავარი გმირი კი მსმენელის წინაშე 21:30 საათზე წარდგება.
მთავარი სცენის გარდა, „ლოკო პარკის” ტერიტორიაზე ასევე განთავსებული იქნება დამატებით ორი სივრცე: Red Bull-ის სცენა, რომელზეც 16:30-დან 19:30 საათამდე დიჯეი Roma J დაუკრავს და Freedom Stage, სადაც 17:00 – 20:00 საათებში მსმენელის წინაშე Adia წარდგება.
ორგანიზატორები მოუწოდებენ მომხმარებელს, არ შეიძინონ ბილეთები მესამე პირებისგან, ე.წ. გადამყიდველებისგან და აფრთხილებენ, რომ მსგავს შემთხვევაში Flitz Collective პოტენციურ ზარალზე პასუხისმგებლობას არ იღებს.
ტერიტორიაზე აკრძალულია: ბასრი ან აალებადი ნივთები და ნებისმიერი საკვები და სასმელი.
ღონისძიებაზე დასწრება შეუძლიათ 18+ ასაკის პირებს. 12+ სტუმრებს კი თან უნდა ახლდეთ ზრდასრული პირი ასაკის დამადასტურებელი მოწმობით.
ტერიტორიაზე შესასვლელად თან უნდა იქონიოთ პირადობის მოწმობა, პასპორტი ან მართვის მოწმობა.
ლოკაციაზე მოსასვლელად ეწვიეთ ბმულს.
