ედ შირანის ბოლო კონცერტის შემდეგ დეტროიტში, აპარატურის დემონტაჟისას მომხდარი ინციდენტის შედეგად, ექვსი მუშა დაშავდა. დაზარალებულები საავადმყოფოში გადაიყვანეს.
Detroit Free Press-ის ცნობით, მიჩიგანის შრომის უსაფრთხოებისა და ჯანმრთელობის ადმინისტრაციამ 31 აგვისტოს დაადასტურა, რომ ამ ფაქტთან დაკავშირებით გამოძიება უკვე დაწყებულია.
Billboard-თან გაზიარებულ განცხადებაში ქალაქის სახანძრო სამსახურმა განმარტა, რომ პირველადი დახმარების ჯგუფმა გვიან ღამით მიიღო შეტყობინება და კონცერტის ჩატარების ადგილზე, მრავლობითი დაზიანებების მქონე ექვს პირს პირველადი სამედიცინო დახმარება აღმოუჩინეს.
„საავადმყოფოში ექვსი ადამიანი გადაიყვანეს. ორი მათგანი Superior Ambulance-ის სასწრაფო დახმარების ბრიგადამ წაიყვანა, რომელიც ღონისძიების პერიოდში ისედაც ადგილზე იმყოფებოდა. ხოლო ოთხი დაშავებული დეტროიტის სასწრაფო სამედიცინო დახმარების ჯგუფმა გადაიყვანა. მიუხედავად იმისა, რომ ჰოსპიტალიზებულთაგან არც ერთი მათგანის დაზიანება სიცოცხლისთვის საშიში არ იყო, ტრანსპორტირებისას ორი პაციენტის მდგომარეობა მძიმე იყო, ოთხის კი სტაბილური“, – ნათქვამია განცხადებაში.
Billboard ედ შირანის წარმომადგენლებსაც დაუკავშირდა. მომღერალს მომხდართან დაკავშირებით საჯარო კომენტარი ჯერჯერობით არ გაუკეთებია.
Ford Field-მა – დეტროიტის სპორტულმა და საკონცერტო არენამ, განცხადებაში სახანძრო სამსახურსა და სასწრაფო სამედიცინო დახმარების გუნდებს „სწრაფი რეაგირებისთვის“ მადლობა გადაუხადა და აღნიშნა: „დაზარალებული ადამიანების პატივისცემისა და გამოძიების ობიექტურობის დასაცავად, მიზეზებზე ვარაუდებისგან ამ ეტაპზე თავის შეკავებას ვამჯობინებთ.”
ედ შირანმა დეტროიტში კონცერტი 29 აგვისტოს, მიმდინარე Loop Tour-ის ფარგლებში გამართა. ტურნე იანვარში დაიწყო და ნოემბერში, შეერთებულ შტატებში დაგეგმილი რამდენიმე კონცერტისა და ლათინოამერიკული ეტაპის შემდეგ დასრულდება.
ბრიტანელი პოპვარსკვლავის ბოლო ალბომი – Play, გასული წლის სექტემბერში გამოვიდა, რომელმაც Billboard 200-ში მე-5 ადგილი, ხოლო დიდი ბრიტანეთის ალბომების ჩარტში პირველი ადგილი დაიკავა.
