შონ მენდესმა საჯაროდ პირველად ისაუბრა ღაზაში მიმდინარე მოვლენებზე.
პოპმომღერალმა ხუთშაბათს, 12 ნოემბერს, ინსტაგრამზე განცხადება გამოაქვეყნა, რომელიც იწყება სიტყვებით: „თავისუფლება პალესტინას.“
„ჩვენ თვალწინ გენოციდი ხდება,” – დაწერა მან. „ღაზაში უაზრო მკვლელობები უნდა შეწყდეს. პალესტინელი ბავშვები და ოჯახები უკვე ძალიან დიდი ხანია, იტანჯებიან და მათ ჩვენი დახმარება სჭირდებათ.”
მუსიკოსმა ასევე განმარტა, რომ ბოლო პერიოდში ცდილობს, რაც შეიძლება მეტი ინფორმაცია მიიღოს და უკეთ გაერკვეს არსებულ ვითარებაში, რათა გაიგოს, სად და როგორ შეუძლია ცვლილებების მოხდენა. მან ყველას მოუწოდა, მხარი დაუჭირონ ისეთ ორგანიზაციებს, როგორებბიცაა: Palestine Children’s Relief Fund, Watermelon Pictures და Woven Futures Fund. მან კოლეგებსაც მიმართა და აღიარა, თუ რამდენად შიშის მომგვრელი შეიძლება იყოს პოზიციის საჯაროდ დაფიქსირება.
„ამას ახლაც ვგრძნობ, როცა ამ სიტყვებს ვწერ,” – აღნიშნა მან. „თუმცა, ამავდროულად, ვგრძნობ, რომ დასახმარებლად რაღაც უნდა გავაკეთო. რაც უფრო მეტი ჩვენგანი გამოიყენებს საკუთარ ხმას, მით უფრო ახლოს ვიქნებით ცვლილებებთან. თუ ჩემს პოზიციას ეთანხმებით, გთხოვთ, საკუთარ გულს მოუსმინოთ, გამბედაობა მოიკრიბოთ და დახმარებისთვის ყველაფერი გააკეთოთ, რაც კი შეგიძლიათ. ამ პალესტინელ ბავშვებს უკვე ძალიან დიდი ხანია, გამბედაობის გამოჩენა უწევთ. ახლა ჩვენი ჯერია, იგივე გავაკეთოთ“.
Billboard Hot 100-ის ლიდერმა მომღერალმა განცხადება შემდეგი სიტყვებით დაასრულა: „მოდი, ნორმად ვაქციოთ საკუთარი პოზიციის ღიად დაფიქსირება და იმ ადამიანების დაცვა, რომლებიც ჩაგვრისგან იტანჯებიან“.
მენდესი იმ ცნობილი ადამიანების მზარდ ჯგუფს შეუერთდა, რომლებმაც პალესტინელი ხალხის მიმართ მხარდაჭერა საჯაროდ გამოხატეს. Associated Press-ის თანახმად, ღაზის ჯანდაცვის სამინისტრო ავრცელებს მონაცემებს, რომ ისრაელის სამხედრო მოქმედებების შედეგად, სამი წლის განმავლობაში 74 000-ზე მეტი ადამიანი დაიღუპა მას შემდეგ, რაც 2023 წლის 7 ოქტომბერს ტერორისტული დაჯგუფების თავდასხმას 1200-მდე ისრაელელი ემსხვერპლა. 2025 წლის ოქტომბერში ცეცხლის შეწყვეტის შეთანხმება გაფორმდა, თუმცა „როიტერის” ისინფორმაციით, ისრაელმა „ჰამასზე“ იერიშები გააგრძელა. განახლებულ თავდასხმებს კი დამატებით 1600 პალესტინელის სიცოცხლე ემსხვერპლა.
გაერომ ისრაელის ქმედებები პალესტინელების წინააღმდეგ გენოციდად შეაფასა, თუმცა ისრაელი და მისი მოკავშირეები, მათ შორის აშშ, ამ შეფასებას უარყოფენ. ცნობილი არტისტები, როგორებიც არიან ოლივია როდრიგო, სიუზან სარანდონი, მარკ რუფალო და დუა ლიპა, კვლავ აქტიურად ავრცელებენ მოწოდებებს ღაზაში პალესტინელების მკვლელობების შეწყვეტის შესახებ. ამასობაში, მაკლემორმა Free Palestine Tour-ის ფარგლებში სამი კონცერტი დააანონსა, რომელშიც მონაწილეობას მიიღებენ მოწვეული არტისტები, მათ შორის ჰოზიერი და Kneecap.
ნახეთ შონ მენდესის განცხადება:
