A$AP Rocky-მ და რიანამ მოდის ინდუსტრიაში საკუთარი გავლენა არაერთხელ დაამტკიცეს და კარიერის განმავლობაში ასობით ჟურნალის გარეკანი დაამშვენეს. ახლა კი ჟურნალის ყდაზე მათი სამი წლის ვაჟიც გამოჩნდა. რაიოტ როუზი ჟურნალ Arena HOMME+-ის უახლესი ნომრის გარეკანზეა.
ეს არ ყოფილა მხოლოდ ერთი გარეკანი – რაიოტი ექვს სხვადასხვა ფოტოსესიაში გადაიღეს, სადაც მან მოდის შეგრძნებითა და განსხვავებული სტილით გამოიჩინა თავი.
ერთ ფოტოზე მას სკუნსის პრინტით გაფორმებული ბეწვის ქუდი ახურავს, მეორეზე მძივებიანი ყელსაბამი უკეთია, მესამე ფოტოში კი პატარა რაიოტი ელეგანტურ კოსტიუმსა და ქუდში პოზირებს.
რიანამ ყველა გარეკანი საკუთარ ინსტაგრამზე გამოაქვეყნა და რაიოტს უკვე უამრავი ცნობილი გულშემატკივარი გაუჩნდა. ფოტოებზე კომპლიმენტები დაწერეს ტრეისი ელის როსმა, ბასტა რაიმსმა და DJ ხალედმა. „ის ამისთვის არის დაბადებული! მისი გამომეტყველება ყველაფერს ამბობს“, – დაწერა ჩიკაგოელმა რეპერმა Dreezy-მ.
როგორც ჩანს, ეს რაიოტის, როგორც პატარა მოდის ვარსკვლავის, კარიერის მხოლოდ დასაწყისია. ამ მხრივ ის უკვე ფლობს უპირატესობას უფროს ძმასა და უმცროს დაზე.
რაიოტი საზოგადოებაში პირველად აგვისტოში გამოჩნდა, როდესაც რიანამ სამივე შვილი მშობლიურ ბარბადოსში წაიყვანა. ოჯახმა მომღერლის სამშობლო მოინახულა, სადაც მისი სახელწოდების ქუჩა ტურისტულ ღირსშესანიშნაობად იქცა.
„ერთი წუთით თავს ისევ ვესტბერის ბავშვად ვგრძნობ… მეორე წუთს კი უკვე საკუთარი შვილები მიმყავს Rihanna Drive-ზე“, – დაწერა მომღერალმა ინსტაგრამზე ბარბადოსში ყოფნის დროს. „გასაოცარია, როგორ ვითარდება ცხოვრება! დიდება კი ეკუთვნის და ყოველთვის ეკუთვნოდა ყოველისშემძლე შემოქმედს!!!”
მიმდინარე წლის დასაწყისში რიანამ მინიშნება გააკეთა, რომ A$AP Rocky-სთან მეოთხე შვილზე ფიქრობს და ორსულობის თემაც აქტიურად აქვს გონებაში. „მოიცადე! ესე იგი, გიჟი არ ვარ?” დაუწერა მან მონტანა როუზ ბრაუნს, რომელიც კიდევ ერთი შვილის გაჩენაზე მსჯელობდა.
დაათვალიერეთ რაიოტ როუზის ექვსივე გარეკანი:
