42 წლის მომღერალმა ავრილ ლავინმა 13 ნოემბერს გაამჟღავნა, რომ მას და მის პარტნიორს, რომლის ვინაობაც უცნობია, საერთო შვილი შეეძინათ. ამ ამბავმა გულშემატკივრების გაოცება გამოიწვია, რადგან მათ წარმოდგენაც არ ჰქონდათ, რომ მომღერალი ბავშვს ელოდებოდა.
Billboard Hot 100-ის ჩარტის ლიდერმა, რომელიც პირველად გახდა დედა, სასიხარულო ამბავი ინსტაგრამზე შავ-თეთრი ფოტოების სერიით გააზიარა.
პირველ ფოტოზე მისი პატარა გოგონას ნაზი ხელი ჩანს, რომელსაც მამისა და ავრილ ლავინის ხელები უჭირავს. მეორე ფოტოზე პოპ-როკ ვაარსკვლავი პატარას გულში იკრავს. მესამე ფოტოზე სიმბოლურად სამი წყვილი Vans-ის ფეხსაცმელია გამოსახული, რომელიც, როგორც ცნობილია, ლავინისთვის სავიზიტო ბარათად ქცეული კედებია. ფეხსაცმელები ერთ რიგადაა ჩამწკრივებული, რომელთაგან ერთი, ბუნებრივია, სხვებზე საგრძნობლად პატარაა.
„ჩვენი პატარა, შეუდარებელი პრინცესა დაიბადა“, – დაწერა მომღერალმა ფოტოების აღწერაში. ამ სიტყვებით მან 2007 წლის სინგლის, Girlfriend-ის ტექსტზეც მიანიშნა, რომელმაც Billboard Hot 100-ის ჩარტში პირველი ადგილი დაიკავა.
ამ განცხადებამდე ავრილ ლავინს ინსტაგრამზე ერთ წელზე მეტი ხნის განმავლობაში არაფერი გამოუქვეყნებია. ახლა კი გულშემატკივრებისთვის ცნობილი გახდა, რა ხდებოდა მომღერლის პირად ცხოვრებაში. მიუხედავად იმისა, რომ არტისტმა შვილის დაბადების შესახებ გამოქვეყნებულ პოსტზე კომენტარები გამორთო, გულშემატკივრებმა ემოციების გასაზიარებლად მისი მეორე, ყველაზე ბოლო პოსტის კომენტარებში გადაინაცვლეს, რომელიც 2025 წლის ოქტომბერში გამართული ფესტივალის When We Were Young ფოტო კოლაჟია.
აშკარაა, რომ ავრილ ლავინს პირადი ცხოვრების საიდუმლოდ შენახვა შესანიშნავად გამოსდის. გულშემატკივრებისთვის უცნობი იყო არა მხოლოდ ის, რომ მომღერალი დედა ხდებოდა, არამედ ისიც, თუ ვინ არის მისი ამჟამინდელი პარტნიორი. გრემის ნომინანტი მომღერალი 2023 წელს რეპერ Tyga-სთან რომანის შემდეგ, საჯარო ურთიერთობაში არ ყოფილა. მანამდე კი მუსიკოსი Mod Sun-ზე იყო დანიშნული.
